“Təzə bazar”da bəzi yemiş növlərinin satışı dayandırıldı

Kənd Təsərrüfatı Nazirliyi yanında Dövlət Fitosanitar Nəzarəti Xidmətinin Respublika Nəzarət Toksikologiya Laboratoriyası bu gün Bakıda yerləşən daha bir bazarda satışa çıxarılan qarpız və yemişlərin tərkibini yoxlayıb.

Bu haqda APA-ya laboratoriyanın rəhbəri Yaqub İbrahimov məlumat verib. Y.İbrahimovun sözlərinə görə, “Təzə bazar”da satılan qarpız və yemişlərdən götürülən nümunələr analiz edilib: “Analizlərin nəticələrinə görə, qarpızlarda heç bir problem üzə çıxmadı. Amma bazara Kürdəmir, Sabirabad və Saatlıdan gətirilən bəzi yemişlərin tərkibində nitratın miqdarının bir qədər çox olduğu aşkarlandı. Bunu həmin rayonlardan gətirilən bütün yemişlərə aid etmək olmaz, bu bəzi təsərrüfatların yetişdirdiyi məhsullara aiddir. Məsələ ilə bağlı bazar rəhbərliyinə məlumat verilib və həmin məhsulların bazardan çıxarılması təmin edilib”.

Qeyd edək ki, analoji yoxlamalar bir qədər əvvəl Bakının “8-ci km” bazarında həyata keçirilib. Həmin yoxlamalar zamanı da bazarda satılan bəzi yemişlərin tərkibində nitratın miqdarının bir qədər çox olduğu aşkarlanmış, satışına qadağa qoyulmuşdu.