Qadın zorakılığına qarşı təlim
02 iyul 2009 12:30 (UTC +04:00)

Qadın zorakılığına qarşı təlim

BMT-nin Əhali Fondu Bakıda dövlət qurumları üçün nəzəri-praktik təlim təşkil edib

BMT-nin Əhali Fondu Bakıda Ailə, Qadın və Uşaq Problemləri üzrə Dövlət Komitəsi ilə birlikdə “Zorakılıq qurbanı olan qadınlar və onların uşaqları üçün reabilitasiya mərkəzlərinin yaradılması, monitorinqi və qiymətləndirilməsi” mövzusunda iki günlük təlim keçirib. Azərbaycanda Gender Əsaslı Zorakılıqla Mübarizə Layihəsi çərçivəsində müvafiq dövlət qurumlarının təmsilçiləri üçün təşkil olunmuş bu təlim gender məsələləri üzrə beynəlxalq ekspertlər - Türkiyənin Başkent və Hacəttəpə universitetlərinin mütəxəssisləri tərəfindən aparılıb.

Lent.az-ın məlumatına görə, təlimdə Ailə, Qadın və Uşaq Problemləri üzrə Dövlət Komitəsinin, Ombudsman Aparatının, səhiyyə, daxili işlər, əmək və əhalinin sosial müdafiəsi, gənclər və idman, ədliyyə və təhsil nazirliklərinin əməkdaşlarından ibarət təlim iştirakçılarına gender zorakılığı, onun səbəb və nəticələri barədə ümumi məlumat verilib. Həmçinin ailə zorakılığının uşaqların psixologiyasına təsirindən danışılıb. Türkiyəli ekspertlər zorakılıq qurbanları üçün reabilitasiya mərkəzlərinin yaradılmasının vacibliyi, gender zorakılığının qurbanlarına dəstək üzrə əsas beynəlxalq standartlar, bu cür mərkəzlərin modelləri və xüsusilə bu sahə üzrə Türkiyə təcrübəsi, sığınacaqların fəaliyyət mexanizmi, gender zorakılığına dair qanunvericilik aktları və digər mövzular haqqında ətraflı məlumat veriblər.

Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova belə tədbirlərin qadınlara qarşı zorakılıq hallarının aradan qaldırılmasına böyük töhfə verdiyini deyib.

Elxan SALAHOV
# 743

Oxşar yazılar