Dünyanın tanınmış fizikləri Bakıya toplaşır

Gələn həftə Bakıda dünya alimlərinin yarımkeçiricilər fizikası üzrə beynəlxalq konfransı keçiriləcək. Sentyabrın 27-dən 30-dək davam edəcək konfransda Avropa və Asiyanın tanınmış elm mərkəzlərinin alimləri də iştirak edəcək.

Milli Elmlər Akademiyasından (MEA) Lent.az-a bildiriblər ki, yarımkeçiricilər fizikasına dair konfrans dünyanın məşhur elmi mərkəzlərində keçirilən tədbirlərin davamıdır. Bakıda təşkil olunacaq konfransın əsas təşkilatçıları isə MEA-nın Fizika İnstitutu, Rabitə və İnformasiya Texnologiyaları Nazirliyi, Təhsil Nazirliyi və Heydər Əliyev Fondudur.

Konfransda Yaponiya, Almaniya, Fransa, Avstriya, ABŞ, İsveç, İspaniya, Rusiya və digər ölkələrdən tanınmış fiziklər iştirak edəcəklər. Tədbirdə üçqat və daha mürəkkəb yarımkeçirici birləşmələr, fizika, kimya, materialşünaslıq, maşınqayırma mövzular ətrafında elmi müzakirələr aparılacaq.

Elxan SALAHOV