On birincilərin attestat problemi

Orta məktəblərin builki məzunları attestat qiymətlərini göstərən arayışı almaqda çətinlik çəkir

Hazırda 11-ci sinifdə təhsil alan və ali məktəblərə sənəd qəbulunda iştirak etmək istəyən abituriyentlər çaşqınlıq içərisindədir. Səbəb onların attestat balı barədə məktəbdən arayış ala bilməməsidir.

Lent.az-ın məlumatına görə, dərs ili başa çatmadığından orta məktəb rəhbərliyi məzunlara attestat verə bilmir. Rüblük və buraxılış imtahanları üzrə qiymətlər hələ məlum olmadığından məzunlara attestat balına dair arayış da vermək mümkün deyil.

Tələbə Qəbulu üzrə Dövlət Komissiyasında (TQDK) narahatçılıq üçün ciddi əsas olmadığını bildirirlər. Komissiyada deyirlər ki, ali məktəblərə və orta təhsil bazasından (11 illik) orta ixtisas məktəblərinə keçirilən qəbul imtahanlarında iştirak etmək istəyən əvvəlki illərin məzunu olan abituriyentlər internet vasitəsilə elektron ərizə doldurarkən attestat qiymətlərini müvafiq bölmədə göstərməlidir. Onlar Sənəd Qəbulu Komissiyasına (SQK) elektron ərizəni təsdiq etdirmək üçün müraciət edərkən digər sənədlərlə yanaşı orta təhsil haqqında attestatı təqdim etməlidirlər. Bu ilki məzunlar isə attestat əvəzinə təhsil aldıqları tədris müəssisəsinin təsdiq etdiyi (attestat qiymətləri göstərilməklə) arayışı SQK-ya təqdim edə bilərlər.

Komissiyadan bildiriblər ki, ali məktəblərinin bakalavr pilləsinə və orta təhsil bazasından orta ixtisas məktəblərinə tələbə qəbulu iki mərhələdə aparılacaq. Aprelin 21-dən mayın 31-dək olan birinci mərhələdə abituriyentlər "Abituriyentin elektron ərizəsi" formasını şəxsən doldurmalıdır. Artıq bu gündən başlayan ikinci mərhələdə (28 aprel - 31 may 2009-cu il) isə abituriyent tələb olunan sənədləri SQK-ya təqdim etməklə elektron ərizəsini təsdiqləməlidir. Bu zaman cari ilin məzunları müəyyən edilmiş formada, təhsil müəssisəsi tərəfindən verilən və abituriyentlərin buraxılış sinfində oxuduqlarını təsdiq edən arayışı da təqdim etməlidir. 2009-cu il aprelin 30-dək 16 yaşı tamam olmayan abituriyentlərə verilən arayışa abituriyentin 3x4 sm ölçüdə şəkli yapışdırılmalı və möhürlə təsdiqlənməlidir.

Elxan SALAHOV