Təhsil nazirindən xəbərdarlıq

Misir Mərdanov bəzi rayon təhsil şöbələrinə xəbərdarlıq edib
Təhsil naziri Misir Mərdanov bəzi rayon təhsil şöbələrinə xəbərdarlıq edib. Lent.az-ın Gəncəbasar müxbirinin verdiyi məlumata görə, bu barədə bu gün Gəncədə səfərdə olan nazir Misir Mərdanov jurnalistlərə verdiyi açıqlamada bildirib. Xəbərdarlıq məktəblərdəki sınaq imtahanlarında aşağı göstəricinin əldə olunması ilə bağlı olub. Sonuncu sınaq imtahanlarında ölkənin cənub bölgəsinin bəzi rayonları və qərb bölgəsindən Şəmkir, Gədəbəy rayonları üzrə aşağı nəticə əldə olunub. Nazir Misir Mərdanov sınaq imtahanları ilə bağlı daha ətraflı müzakirələrin aparılacağını, lazımi qərarların veriləcəyini vurğulayıb.
Nazir rus dilinin xarici dil kimi tədrisinə də münasibət bildirib. Onun sözlərinə görə, artıq xeyli müddətdir ki, rus dili müəllimləri işlə təminat üçün ixtisas artırma kurslarına cəlb olunur. Lakin bununla yanaşı, son zamanlar orta məktəblərdə rus dilinin öyrənilməsinə tələbat çoxalır. “Rus dilinin orta məktəblərdə xarici dil kimi tədrisi böyük əhəmiyyətə malikdir. Çünki dünyaya inteqrasiya edən Azərbaycanda yetişməkdə olan nəslin bu dili bilməsi mühüm rol oynayır. Rus dilinə marağın artmasında məktəb direktorları və pedaqoqların da üzərinə məsuliyyət düşür” - deyə M.Mərdanov əlavə edib.
Vüsalə Cənnətova