“Əsirlikdəki əsgərimizin 3-cü ölkəyə getməsi ilə bağlı müraciət olunmayıb”

“Ermənistanda əsirlikdə olan Azərbaycan Ordusunun əsgəri Rafiq Həsənovun azad olunması ilə bağlı danışıqlar prosedur qaydasında davam edir.

Bu işdə gərginlik ondan ibarətdir ki, Azərbaycan mətbuatında Rafiq Həsənov barəsində yazılanların çoxu həqiqətəuyğun deyil. Bu isə onun azad olunması ilə bağlı prosesə ziyan vurur”.

APA-nın məlumatına görə, bu sözləri Əsir və itkin düşmüş, girov götürülmüş vətəndaşlarla əlaqədar Dövlət Komissiyasının İşçi Qrupunun rəhbəri Firudin Sadıqov deyib.

F. Sadıqovun sözlərinə görə, R. Həsənovun üçüncü ölkəyə getməsi ilə bağlı müraciət olunmayıb, mətbuatda bununla bağlı yayılan məlumatlar yanlışdır: “Azərbaycan mətbuatında özlərini vətənpərvər kimi qələmə verən jurnalistlər Rafiq Həsənovla bağlı cinayət işinin qaldırılması haqqında məlumatlar yazırlar. Bu məlumatların da hamısı ona çatdırılır. Həmin jurnalistlərdən soruşmaq lazımdır ki, bu cinayət işini görmüsünüz və ya kimdənsə məlumat almısınız? Biz onun azad olunmağına çalışırıq. Amma mətbuatda məntiqə, insanlığa zidd yazılar verilir. Bütün bunların Rafiq Həsənovun azad olunmasına çox ciddi ziyanı var”.

Vaxtilə Ermənistanda əsirlikdə olan Samir Məmmədov haqqında da belə yazıların yazıldığını xatırladan F. Sadıqov deyib ki, mətbuat yenə də eyni səhvi təkrarlayır.