Demokrat Makbray ABŞ Konqresində ilk transseksual oldu

Keçən il 37 ştatda qanunvericilər transgenderlərin məhdudlaşdırılmasına yönəlmiş 140-dan çox qanun layihəsi təklif ediblər.

Demokratik qüvvələrin nümayəndəsi Sara Makbray ABŞ Nümayəndələr Palatasına seçilən ilk açıq transseksual şəxs olub.

Lent.az bildirir ki, “Reuters”in məlumatına görə, “Edison Research”in proqnozlarına görə, Makbray Delaver dairəsində keçirilən seçkilərdə qalib gələrək ABŞ Konqresinin Nümayəndələr Palatasına seçilib.

Qeyd olunur ki, 34 yaşlı ştat senatoru demokratlar üçün təhlükəsiz hesab edilən Delaver ştatının genişləndirilmiş konqres dairəsində rəqabətli praymerizdə qalib gəlib.

2020-ci ildə o, ştat senatoru kimi fəaliyyət göstərən ilk açıq transseksual şəxsdir və daha əvvəl, 2016-cı ildə milli siyasi partiyanın qurultayında çıxış edən ilk transgender qadın olub. Makbray həm də 2012-ci ildə prezident Barak Obamanın dövründə Ağ evdə təcrübə keçən ilk şəxs olub.

Seçkidən əvvəl o, “Reuters” agentliyinə müsahibəsində namizədliyinin tarixi aspektini arxa plana qoyaraq seçicilər üçün prioritet məsələlərə diqqət yetirdiyini vurğulayıb.

"Birinci olanda, tez-tez özünün ən yaxşı versiyası olmaq üçün səy göstərməlisən... Amma mən Delaver üçün ola biləcəyim ən yaxşı Konqresin üzvü kimi öz öhdəliklərimi yerinə yetirməsəm, bunların heç biri əhəmiyyət kəsb etmir", - o vurğulayıb.

Gənc transgender amerikalılar üçün namizədliyinin mənası barədə soruşduqda, o, belə cavab verib:

“Ölkəmizin ürəyinin onları qəbul edəcək qədər böyük olub-olmadığına şübhə edən hər kəs bilməlidir ki, onlar burada öz evlərindədirlər... Demokratiyamız hamımız üçün kifayət qədər böyükdür”.

Delaver ştatının Uilminqton şəhərində böyüyən Makbray 2011-ci ildə kaminq-out edib. O, siyasətə inklüziv mühit arzusu ilə daxil olub.

Makbray artıq X sosial şəbəkəsində seçicilərə təşəkkür etib:

"Təşəkkür edirəm, Delaver! Səsləriniz və dəyərləriniz məni Konqresin növbəti üzvünüz olmaqdan qürurlandırır. Delaver aydın və yüksək səslə bildirdi ki, biz reproduktiv azadlığı qoruyan, bütün ailələrimiz üçün ödənişli məzuniyyət və əlverişli uşaq baxımı təmin edən, mənzil və səhiyyənin hər kəs üçün əlçatan olmasını təmin edən bir ölkə olmalıyıq..."