ABŞ-dakı səfirimiz Stratfor Analitik Mərkəzində çıxış edib

Azərbaycanın ABŞ-dakı səfiri Elin Süleymanov Texas ştatına səfəri çərçivəsində paytaxt Ostin şəhərində Amerikanın aparıcı geosiyasi araşdırma mərkəzlərindən biri hesab edilən Stratfor Analitik Mərkəzində analitiklərlə görüş keçirib. Səfirlikdən Lent.az-a verilən məlumata görə, görüşün moderatoru sözügedən Mərkəzin yaradıcısı və rəhbəri Corc Fridman olub.

E.Süleymanov Cənubi Qafqaz regionunun strateji önəmi barədə məlumat verərək, ölkəmizin İran və Rusiya ilə sərhədə malik yeganə dövlət olmasının Azərbaycan xarici siyasətinə təsiri, Azərbaycan hökumətinin yürütdüyü tarazlaşdırılmış xarici siyasət barəsində danışıb. Ermənistanın regional layihələrə, ümumilikdə inteqrasiya proseslərinə cəlb olunması üçün Dağlıq Qarabağ münaqişəsinin həllinin zəruri element olduğunu əlavə edib.

Regionda həyata keçirilən irimiqyaslı enerji və nəqliyyat layihələrinə toxunan səfir Azərbaycanın bundan öncəki təşəbbüslərin icrası zamanı etibarlı müttəfiq imici formalaşdırdığını bildirib.