Xoruldama haqqında 5 fakt: hər kəsin bilməsi VACİBDİR

Xoruldama həqiqətən başqalarını bezdirir, baxmayaraq ki, günahkar özü çox narahatlıq hiss etmir. Təəssüf ki, az adam xoruldayan insanın özü üçün xoruldama vəziyyətinin ciddi problemlərə çevrilə biləcəyini bilir. Xoruldama tənəffüs problemi səbəbiylə ölümə və ya sağlamlığın pisləşməsinə səbəb ola bilər.

Lent.az xarici mediaya istinadla xoruldama ilə bağlı bəzi maraqlı faktları təqdim edir.

Ən çox xoruldayan millət

Koreyalılar ən xoruldayan millət sayılırlar: uzun yumşaq damaqlarına görə genetik olaraq xoruldamağa meyllidirlər. Bu səbəbdən koreyalılar yatarkən çənəni düzəltmək üçün xüsusi yastıqlardan istifadə etmək məcburiyyətindədirlər.

Allergiya xoruldamağa təsir göstərir

Həyatınızda heç vaxt xoruldamamış olsanız da, bir allergiya ilə qarşılaşdıqda selikli qişanın şişməsi yarana bilər ki, bu da xoruldama və digər tənəffüs problemlərinə səbəb olar.

Alkoqol və siqaretin təsiri

Statistikaya görə, müntəzəm olaraq siqaret çəkən və içən insanlar, sağlam həyat tərzi sürənlərdən daha çox xoruldamaqdan əziyyət çəkirlər. Bu, tənəffüs yollarının selikli qişasının vəziyyəti ilə izah olunur.

Xoruldama və tənəffüs dayanması

Xoruldama insanın yuxu zamanı tənəffüs tutması yaşadığını göstərə bilər. Yuxu zamanı nəfəsin kəsilməsi, başqa sözlə apne, tənəffüs yollarının deşiyi tamamilə bağlandıqda baş verir ki, bu da beynin oksigen açlığı və qan təzyiqinin artması ilə müşayiət olunur. İnsanı hava çatışmazlığı hissi və güclü xoruldama ilə oyandıran budur. İnsan nə qədər çox xoruldayırsa, xüsusən 40 yaşdan yuxarı insanlarda qan təzyiqi o qədər yüksək olur.

Xoruldama və artıq çəki

Kök insanlarda boyundakı yağ tənəffüs yollarına təzyiq göstərir, daralır və xorultu ehtimalı artır. Yaxşı xəbər budur ki, bədən çəkinizin yalnız 10 faizini itirmək böyük bir dəyişiklik yarada bilər.