Depressiyadan xilas olmağın yolu: Bu qidaları yeyin

Alimlər kalium çatışmazlığının depressiya ilə əlaqəsini üzə çıxarıblar.

Nyu-York Texnologiya İnstitutunun alimləri ABŞ və Koreyada 22 mindən çox insanın qidalanma rasionunu təhlil ediblər. Araşdırma nəticəsində məlum olub ki, kifayət qədər kalium qəbul edən insanların depressiyadan əziyyət çəkmə ehtimalı daha aşağıdır. Əksinə, bu mineralın çatışmazlığı əhvalın pisləşməsi və psixi pozğunluqlar riskini artırır.

Lent.az bu barədə xarici mediaya istinadən xəbər verir.

Kaliumun əhəmiyyəti

Mütəxəssislərin sözlərinə görə, kalium sinir sisteminin normal fəaliyyəti və serotonin, dopamin kimi neyrotransmitterlərin yaranması üçün vacibdir. Klivlend klinikasının dietoloqu Culiya Zumpano qeyd edib ki, kalium çatışmazlığı orqanizmin elektrik sistemini pozur və bu da depressiyaya yol aça bilər.

Hansı məhsullarda var?

Həkimlər gündəlik rasiona banan, avokado, pomidor və ispanaq əlavə etməyi məsləhət görürlər. Məsələn, 7 banan, 3 avokado və ya 13 orta ölçülü pomidor gündəlik təxminən 2,6 qram kalium təmin edir. Bu isə orta norma hesab olunur.

Kaliumu qidadan kifayət qədər almayan şəxslər üçün əlavələr mövcuddur, lakin onların çox istifadəsi böyrəklərdə problem və hiperkaliumiya yarada bilər.

Tədqiqat həmçinin göstərib ki, ABŞ-da dəmir və sinkin yüksək səviyyəsi depressiya riskini azaldır. Koreyada isə natrium və fosforun yüksək qəbulu müsbət təsir göstərib. Maqnezium və kalsiumun isə əhval-ruhiyyəyə ciddi təsiri aşkarlanmayıb.

Dietoloq Ebbi Sharp bildirib ki, bitki mənşəli və süd məhsulları kalium səviyyəsini normada saxlamağa, həmçinin yüksək dərəcədə emal olunmuş qidaların istehlakını azaltmağa kömək edir. Bu, təzyiqin və iltihabi proseslərin azalmasına, ümumi psixi vəziyyətin yaxşılaşmasına şərait yaradır.

Dəmir çatışmazlığı hələ də ciddi problemdir

Ekspertlər həmçinin xatırladıblar ki, dəmir çatışmazlığı dünyada ən geniş yayılmış mikroelement çatışmazlığıdır. Təxminən 2 milyard insan bu problemdən əziyyət çəkir. Xüsusilə uşaqlar və reproduktiv yaşda olan qadınlarda, hamiləlik dövründə daha çox rast gəlinir.

Dəmir orqanizmdə hemoglobinin sintezində və oksigenin toxumalara daşınmasında əsas rol oynayır. Onun çatışmazlığı tez-tez yorğunluq, üşütmə və digər narahatlıqlarla müşahidə olunur.