Göyərtini yeməyə nə zaman əlavə etmək olar?

Göyərti, ən sadə yeməyi belə kulinariya sənətinin bir əsərinə çevirə bilər — ona xüsusi dad və ətir qatır. Lakin bu möcüzə yalnız bir şərtlə baş verir: göyərti yeməyə düzgün zamanda əlavə olunmalıdır.

Lent.az-ın xəbərinə görə, tanınmış aşpazların fikrincə, bu tez xarab olan inqrediyentin yeməyə əlavə olunması üçün ən uyğun məqam adətən bişirmənin son mərhələsidir. Amma bəzi hallarda bu qaydadan istisnalar da mövcuddur.

Göyərti dərhal yeməyə əsas xüsusiyyətlərini verir - dad, ətir və rəng. Bu, əsas kulinariya qanunlarından biridir. Ancaq göyərtinin tərkibindəki efir yağları (xüsusən cəfəri, şüyüd, keşniş, reyhan və yaşıl soğanda) yüksək temperaturun təsirinə qarşı çox həssasdır.

Uzun müddət qızdırıldıqda bu xüsusiyyətlər sürətlə yox olur: göyərti solur, rəngi itir, aroması buxarlanır, dadı isə bəzən xoşagəlməz, "pərt düşmüş ot" kimi olur. Ona görə də şorba, bulyon, sous kimi maye yeməklərdə göyərti demək olar ki, həmişə ən sonda əlavə olunur. Aromasını, dadını və faydalı maddələrini qorumaq üçün yumşaq yarpaqlar ocaqdan götürüldükdən sonra və ya süfrəyə verilməzdən az əvvəl qazana əlavə olunur. İsti yemək efir yağlarının açılmasına imkan verir, lakin onları yandırmaz.

Qarnir yeməklərində - tərəvəz, püresi və ya dənli yeməklərdə doğranmış göyərti təxminən süfrəyə verilməzdən beş dəqiqə əvvəl əlavə etmək məsləhətdir. Bu müddət ərzində göyərti bir az isinir, zərif şəkildə ətrini buraxır, lakin təravətini və elastikliyini itirmir. Ayrıca qeyd etmək lazımdır ki, bəzi göyərtilər, məsələn, keşniş və reyhan bıçaqla doğranmaq əvəzinə əllə parçalanmalıdır. Bu yanaşma yarpaqların quruluşuna daha az zərər verir, efir birləşmələrini qoruyur və təbii aromanın daha yaxşı açılmasına imkan yaradır. Həm də bu, yeməyə evdə bişirilmiş, rahat və isti görünüş qazandırır.