Beynəlxalq Turizm Filmləri Festivalında baş münsif Ayaz Salayev olacaq

İyunun 25-dən 29-dək keçiriləcək II Bakı Beynəlxalq Turizm Filmləri Festivalının beynəlxalq münsiflər heyətinin tərkibi açıqlanıb. Mədəniyyət və Turizm Nazirliyindən Lent-az-a verilən məlumata görə, filmləri kinematoqrafçılardan, səyahət və turizm ekspertlərindən ibarət 7 nəfərlik beynəlxalq münsiflər heyəti qiymətləndirəcək. Münsiflər heyətinin 3 üzvü Azərbaycandan (Ayaz Salayev, Aynur Talıbova və Vüqar Şıxəmmədov), 4 üzvü isə xarici ölkələrdəndir (Aleksandr Kammel, Spomenka Saraqa, Tofiq Şahverdiyev, Can Özbatur).

Münsiflər heyətinin sədri Ayaz Salayevdir. Beynəlxalq münsiflər heyəti hər kateqoriyada 3 filmi müəyyən edərək mükafatlandıracaq. I yerə - Qızıl mükafat – diplom, mükafat və 2000 avro pul, II yerə - Gümüş mükafat – diplom və mükafat, III yerə - Bürünc mükafat – diplom və mükafat təqdim ediləcək.

Festivalın ən yaxşı filminə isə “QRAN PRİ” – diplom, mükafat və 4000 avro pul təqdim ediləcək.

Bakı Beynəlxalq Turizm Filmləri Festivalının rəsmi tərəfdaşlarından biri “APA Holdinq”dir. Festivalın təşkilati işlərini “Azanfilm” studiyası həyata keçirir. Festivalın müsabiqə proqramında 37 ölkədən 68 film mübarizə aparacaq. Proqramla və münsiflər heyətinin üzvləri ilə daha ətraflı məlumatı www.bitff.az veb-saytından əldə edə bilərsiniz.