Beynəlxalq Atçılıq Federasiyasının prezidenti İçəri Şəhərdə gəzdi - FOTO

Bakıda səfərdə olan Beynəlxalq Atçılıq Federasiyasının prezidenti Ülyahəzrət Haya Bint Əl Hüseyn İçəri Şəhərlə tanış olub.
Nazirlər Kabineti Yanında “İçərişəhər” Dövlət Tarix-Memarlıq Qoruğu İdarəsindən Lent.az-a verilən məlumata görə, Ülyahəzrət Haya Bint Əl Hüseynin İçəri Şəhərdə gəzintisi YUNESKO-nun “Dünya İrsi Siyahısı”na daxil edilmiş, ölkəmizin ən möhtəşəm abidələrindən olan, bir neçə min illik tarixə malik Qız Qalası ilə tanışlıqla başlayıb.
Beynəlxalq Atçılıq Federasiyasının prezidentinin gəzintisi Qoşa Qala meydanı ilə tanışlıqla davam etdirilib, meydan və burada yerləşən qədim binaların inşa tarixi barədə məlumat verilib. Gəzinti zamanı o, milli mətbəximizin nümunəsi olan təndir çörəyinə qonaq edilib.
Ülyahəzrət Haya Bint Əl Hüseyn Azərbaycan xalqının mədəni irsinin incisi, dünya əhəmiyyətli tarixi abidə olan “Şirvanşahlar Sarayı Kompleksi”ndə də olub. O, Məhəmməd Məscidinə gəlmiş və burada ötən il yekunlaşmış muzey-konservasiya işləri ilə tanış olub. Beynəlxalq Atçılıq Federasiyasının prezidenti “Kiçik Karvansara” abidəsində yerləşən Azərbaycan təsviri və dekorativ-tətbiqi incəsənət mərkəzi – “İncəsənət Bağı”ında da olub və İçəri Şəhərin Fəxri Qonaqlar Kitabında öz ürək sözlərini yazıb.