Nəzakət Teymurova “Əzizinəm Qarabağ” deyəcək
17 noyabr 2009 15:15 (UTC +04:00)

Nəzakət Teymurova “Əzizinəm Qarabağ” deyəcək

Azərbaycanın xalq artisti, Opera və Balet Teatrının solisti Nəzakət Teymurovanın növbəti “Əzizinəm Qarabağ” adlı konsert proqramı dekabrın 19-də Heydər Əliyev adına Sarayda keçiriləcək. Lent.az-ın məlumatına görə, 2 hissəli konsertdə xanəndə xanımı “Xarı bülbül” muğam qrupu və Qara Qarayev adına Kamera Orkestri müşayiət edəcək. “Xarı bulbül” muğam qrupunun rəhbəri Əliağa Sədiyevin məlumatına görə, N.Teymurova birinci hissədə muğamları səsləndirəcək. İkinci hissədə isə ən qədim xalq və bəstəkar mahnıları, filmlərdən musiqilər ifa ediləcək. Konsertin adına uyğun olaraq xalq artisti “Qarabağ şikəstəsi”ni ifa edəcək:

“Birinci hissə “Xarı bülbül” qrupunun, ikinci hissə isə qrupla Kamera Orkestrinin müşayiəti ilə keçiriləcək. Orkestrə dirijorluğu xalq artisti Teymur Göyçəyev edir. İkinci hissənin proqramını bəstəkar-pianoçu Ceyhun Allahverdiyev işləyib”.

Xatırladaq ki, bu, Nəzakət Teymurovanın sayca Bakıda verdiyi 3-cü konserti olacaq. Onun ilk konserti 2002-ci ildə Opera və Balet Teatrında keçirilib. İkinci konsert isə 2 il sonra Azərbaycan Dövlət Filarmoniyasında baş tutub.

Lalə Yusifqızı
# 403

Oxşar yazılar