ABŞ 13 milyard dollara yeni “qiyamət təyyarəsi” inşa edəcək

ABŞ Hərbi Hava Qüvvələri nüvə müharibəsindən sağ çıxa bilmə qabiliyyətinə görə "Qiyamət Təyyarəsi" kimi tanınan E-4B-nin varisini hazırlamaq üçün "Sierra Nevada Corp."-a 13 milyard dollarlıq müqavilə imzalayıb.

Lent.az xarici KİV-ə istinadən xəbər verir ki, Survivable Airborne Operations Center (SAOC) layihəsi 1970-ci illərdən köhnəlmiş, istismar müddəti 2030-cu illərin əvvəllərində başa çatacaq təyyarəni əvəz etmək üçün nəzərdə tutulub.

Təyyarə üzərində işlər Kolorado, Nevada və Ohayo ştatlarında aparılacaq və onların 2036-cı ildə başa çatdırılması gözlənilir. Qeyd olunur ki, əməliyyat tələblərinə cavab vermək üçün silah sistemi hərbi tələblərə uyğun təkmilləşdirilmiş və modifikasiya edilmiş reaktiv təyyarənin kommersiya törəməsindən ibarət olacaq.

Qiyamət təyyarəsi

Bu gün ABŞ-da "Qiyamət Təyyarəsi" E-4B "Nightwatch"dur. Adətən ABŞ Müdafiə Nazirinin daşınması üçün istifadə olunsa da, təyyarə nüvə partlayışlarına və elektromaqnit təsirlərinə tab gətirə bilən mobil komanda məntəqəsi kimi hazırlanıb və fövqəladə hallar zamanı ABŞ liderlərinə əmrləri orduya çatdırmağa imkan verir.

E-4B həmçinin havada yanacaq doldurmaq qabiliyyətinə malikdir, konfrans və brifinq otaqları, eləcə də qabaqcıl rabitə avadanlığı ilə təchiz olunub.

Hərbi Hava Qüvvələri hazırda dörd E-4B təyyarəsini idarə edir, onlardan ən azı biri daim işləyir.