Həftənin şou icmalı

Lent.az-ın Show.az saytının həftəlik icmalına istinadən məlumatında bildirilib ki, ayın ilk günündə Azərbaycan istehsalı olan “Buta” filminin “Oskar” qazanma ehtimalı olduğu xəbər yayılıb.

Bu o vaxta təsadüf elədi ki, ölkəmiz tez-tez “Oskar” mərasimlərində görünən Jennifer Lopesi yola salıb, eyni statuslu növbəti xanımı – Rihannanı qəbul etməyə hazırlaşırdı.

Həftənin klip mövzusunda daha çox Nigar Camal, Elçin Cəfərov və Natavanın adı hallandı.

Noyabr ayında Filip Kirkorovun Bakıda gözlənilən konserti də oktyabr ayının ilk günlərində çox müzakirə olundu. Son yayılan xəbərə görə, o, paytaxtımızda 2 gün deyil, cəmi bir gün konsert verəcək.

Həftənin əsas imic dəyişən tanınmışları isə “Kurtlar Vadisi” filminin “Mematisi” və tez-tez hamını təəccübləndirən Lady Qaga idi.

Ümumiyyətlə, son yeddi günün gündəmində türk şou-biznesinin yeri az olmadı. Yeni ilini Bakıda qarşılamağa hazırlaşan Rafet El Roman və Tarkanın evlilik kompleksi mediamızda az müzakirə edilmədi.

Bu həftə ərzində show.az saytı arxivində saxladığı növbəti 4 səs yazısını yayımladı. Bunlar Bilal Əliyev, Əli Mirəliyev, Əlikram Bayramov və Elza Seyidcahan ilə olan zarafatları idi.

Saytın növbəti iki eksklüzivi isə Röyanın 11.000 manatlıq paltarı və Könül Kərimovanın 26.000 manatlıq toy xəbəri oldu.

Ayın ilk yeddi gününün boşanma xəbəri Dəyirmançı Elmirlə bağlı idi. Amma bir ay əvvəl saytımızın ekslüziv olaraq xəbər yaydığı Elşad Xosenin boşanması xəbəri də az danışılmadı. Hətta Xose özü də vəziyyətin pik nöqtəsində olduğunu etiraf etdi.

Həftənin son 3 günü mediamızın şou-biznes gündəmini Rihanna zəbt elədi. Məşhur müğənni ölkəmizə gələr-gəlməz araşdırıb öyrəndik ki, onu qaldığı otelə gətirən avtomobil Bakıda kirayəyə verilən 1000 manatlıq gəlin maşınlarından biridir. Bütün bu detallar bir yana, nəhayət ki, şənbə gecəsi Rihannanın gözlənilən konserti yüksək səviyyədə baş tutdu.
Paytaxtımız isə növbəti dünya şöhrətli müğənni - Şakiranı qarşılamağa hazırlaşır.