Boksçular üçün brilyant kəmər təsis edildi

Ümumdünya Boks Şurası (WBC) elit boksçular arasında döyüşlərin qalibləri üçün fəxri brilyant kəmər təsis edib.

Lent.az-ın WBC-nin rəsmi saytına istinadən verdiyi məlumata görə, kəmər 598 brilyant, 6 yaqut və 150 “Swaroski” kristalları ilə yanaşı, 18 karatlıq qızıl plastinlə bəzədilib.

Brilyant kəmərin yaradılması aralıq çəkilərdə ən yaxşı boksçuların döyüşlərinin populyarlığının artırılmasına xidmət edir. Əvvəllər həmin çəkilərdə görüşlər o qədər də maraqla qarşılanmayıb. Artıq WBC-nin prezidenti Xose Süleyman dünyanın ən yaxşı boksçusu sayılan filippinli Menni Pakiaoya brilliant kəmər uğrunda ilk döyüşə qatılmağı təklif edib.

Pakiaonun rəqibi orta ağır çəkidə dünya çempionu puerto-rikolu Migel Kotto ola bilər. Hələlik rəsmi razılıq əldə edilməsə də, döyüşün noyabrın 14-də baş tutacağı güman olunur.