Gəncədə Yunan-Roma və sərbəst güləş üzrə respublika turniri keçirilir

Turnirdə 13-14 yaşlı güləşçilər iştirak edir
Mayın 21-də Gəncədə yeniyetmə güləşçilərin mübarizə apardığı Yunan-Roma və sərbəst güləş üzrə respublika turnirinə start verilib. Lent.az-ın Gəncəbasar müxbirinin verdiyi məlumata görə, turnirin açılış mərasiminə Respublika Güləş Federasiyasının vitse-prezidenti Elçin Cəfərov, Güləş Federasiyasının 7 saylı nümayəndəliyinin rəhbəri Vaqif Məmmədov da qatılıb.

Gəncə Olimpiya İdman Kompleksində təşkil olunan yarışda ölkənin müxtəlif regionlarından 600-ə yaxın idmançı qüvvəsini sınayır.

Yarışın ilk günündə Yunan-Roma güləşi üzrə 4 çəki dərəcəsində qaliblər müəyyənləşib. Beləki, 32 çəki dərəcəsində Daşkəsən güləş məktəbinin yetirməsi Şahin Bayramov, 35 və 38 çəki dərəcəsində Bakı idmançıları Sənan Süleymanov, Kərim Cəfərov, 42 çəki dərəcəsində isə Gəncə güləşçisi İzzət Salmanov turnirin qalibi adını qazanıb. Bu üsulla güləşənlərin son yarışı mayın 22-də keçiriləcək və sərbəst üsulla güləşən pəhləvanlar döşək üzərinə çıxacaq.

Turnir mayın 24-də yekunlaşacaq.

Vüsalə Cənnətova