Böyükağa Hacıyev: “Foqts müəllim yerində möhkəm oturub”

Avropa Liqasının qrup mərhələsi çərçivəsində İtaliyada "İnter"lə 2:2 bərabərə qalan "Neftçi" klubunun baş məşqçisi Böyükağa Hacıyev oyundan sonra keçirilən mətbuat konfransında jurnalistlərin suallarını cavablandırıb. Apasport.az saytının xəbərinə görə, çalışdırıcı öncə Azərbaycanın bütün futbolsevərlərini salamlayıb:

-Onlara öz təbriklərimizi çatdırırıq. Neçə ildir ki, Azərbaycan futbolu uğursuzluqlardan əziyyət çəkirdi. Bu gün isə "Neftçi" "İnter"ə qarşı gözəl oyun nümayiş etdirdi və rəqiblə bərabərə qaldı. Mən bu sözü dəfələrlə təkrarlamışam. Bir şey ki, reallıqdı, buna niyə inanmayaq?

- "İnter" bu gün hansı cəhətinə görə "Neftçi"dən fərqlənirdi?
- Bəzi qol epizodlarımız oldu. Əgər Vobay Flavinyonu başa düşə bilsəydi, hesab başqa cür də ola bilərdi.

- Mətbuat konfransına hansı əhval-ruhiyyədə gəlmisiniz?
- Məni bu həyatda heç nə ilə təəccübləndirmək olmaz. Bu hesabdan sonra belə şokda deyiləm.

- "Neftçi"nin Avroliqanın qrup mərhələsindəki çıxışı Azərbaycan futboluna nə verdi? Sizcə, bu, artıq inkişafdı, yoxsa inkişafa gedən yol?

- Futbolumuzda inkişaf ləng gedir. Ancaq bu gün hər şey göz qabağındadır. Bu uğur ölkə prezidentinin idmana göstərdiyi qayğının bariz nümunəsidir. Bu uğur Rövnəq Abdullayevin AFFA-ya düzgün rəhbərliyindən irəli gəlir. "Neftçi" futbolumuzun flaqmanıdır. Bütün klub prezidentlərinə tövsiyə edərdim ki, gəlib Sadıq Sadıqovdan təsnifat kursları öyrənsinlər.

- Siz Böyükağa Hacıyev olaraq Azərbaycan millisinin baş məşqçiliyi postuna iddianızı ortaya qoyursunuzmu?
- Millinin baş məşqçisi olmaq şərəf yeridir. Siz bilirsiniz ki, millinin başı bəlalıdır. Foqts müəllim yerində möhkəm oturub. Mən onun işinə maneçilik törətmək istəmirəm. Amma çox güman ki, Azərbaycanı tərk edəcəyəm.