Vəkili polisin döyməsi ilə bağlı araşdırma başladı - RƏSMİ

Bəzi kütləvi informasiya vasitələrində Şirvan Apellyasiya Məhkəməsində keçirilən proses zamanı vəkil Coşqun İsgəndərova zalda olan Şirvan şəhər Polis Şöbəsinin əməkdaşları tərəfindən təzyiq göstərilməsi barədə məlumatlar yayılıb.

Şirvan şəhər prokurorluğu tərəfindən Lent.az-ın sorğusuna cavab olaraq bildirilib ki, avqustun 13-də saat 15:00-dan 15:30-dək olan müddətdə Şirvan Apellyasiya Məhkəməsinin inzibati binasında cinayət işinə apellyasiya qaydasında baxılan zaman bilavasitə məhkəmə iclası zalında və binanın inzibati zonasında asayişin kobud formada pozulması barədə Şirvan şəhər prokurorluğuna Şirvan Apellyasiya Məhkəməsindən material daxil olub.

Bildirilib ki, qeyd olunan faktla bağlı hazırda Şirvan şəhər prokurorluğunda araşdırma aparılır.

Araşdırmanın tam, hərtərəfli və obyektiv aparılmaqla qanuni qərarın qəbul edilməsi təmin ediləcək.

Qeyd edək ki, dünən Şirvan Apelyasiya Məhkəməsində vəkilin polislər tərəfindən döyülməsi ilə bağlı sosial şəbəkədə məlumat yayılmışdı. Daxili İşlər Nazirliyinin mətbuat xidməti isə həmin məlumatı təkzib etmiş və polislərin yalnız vəkil Coşqun İskəndərovu məhkəmə zalından uzaqlaşdırdığını bildirib.

Bu gün isə Daxili İşlər Nazirliyinin Kütləvi İnformasiya Vasitləri və İctimaiyyətlə əlaqələr şöbəsinin rəisi, polis mayoru Elşad Hacıyev Lent.az-a bildirib ki, vəkil C.İsgəndərovun aidiyyəti olmayan məhkəmə prosesi keçirilən zala daxil olması və münaqişəli vəziyyət yaratması ilə bağlı halların bütün təfərrüatları rayon prokurorluğu tərəfindən araşdırılır. Eləcə də tərəflər arasında yaranan münaqişədə polis əməkdaşlarının vəkilə qarşı hər hansı hüquqazidd hərəkətlərinin olub-olmaması ilə bağlı Daxili İşlər Nazirliyi tərəfindən xidməti yoxlama başlayıb.

Araşdırma və yoxlamaların nəticəsindən asılı olaraq, iddialara hüquqi qiymət veriləcək.