Sabiq prokurorluq işçisini maşın vurub öldürdü

Binəqədi rayonunun Atatürk prospektində müəyyən edilməmiş avtomobillə yolu keçən Bakı şəhər sakini İ.Hüseynov vurulub.

Bu barədə Lent.az Daxili İşlər Nazirliyindən məlumat verilib. Bildirilib ki, hadisə aprelin 17-də saat 18 radələrində baş verib. Nəticədə piyada aldığı xəsarətlərdən hadisə yerində ölüb.

Polis əməkdaşlarının keçirdikləri əməliyyat-axtarış tədbirləri nəticəsində piyadanın ölümü ilə nəticələnən yol-nəqliyyat hadisəsini törədərək hadisə yerindən yayınmaqda şübhəli bilinən “Mercedes” markalı avtomobilin sürücüsü, Bakı şəhər sakini, əvvəllər məhkum olunmuş A.Əhmədov müəyyən edilərək saxlanılıb.

Qeyd edək ki, Lent.az-ın əldə etdiyi məlumata görə, ölən piyada, İltifat Hüseynov sabiq prokurorluq işçisidir. Bakı şəhər prokurorluğunda çalışan İ.Hüseynov bir il əvvəl təqaüdə çıxıb. Oruc tuturmuş, orucunu açmaq üçün mağazadan çörək alıb çıxarkən maşın onu vurub.