Başqalarının adına kreditə əşya götürüb satdı - 32 minlik DƏLƏDUZLUQ

Lənkəranda vətəndaşlara qarşı külli miqdarda dələduzluq edilib.

Lent.az xəbər verir ki, Lənkəran Şəhər Rayon Polis Şöbəsinin əməkdaşlarının keçirdikləri tədbirlərlə ayrı-ayrı vətəndaşların etibarından sui-istifadə edərək tanınmış mağazalar şəbəkəsindən onların adına kredit yolu ilə götürülmüş məişət avadanlıqlarını dələduzluq yolu ilə ələ keçirən şəxs saxlanılıb.

Araşdırmalarla müəyyən edilib ki, həmin cinayət əməlini törətməkdə şübhəli bilinən əvvəllər məhkum olunmuş 43 yaşlı Cavid Abdullayev 8 nəfərin adına kreditlə alınmış məişət avadanlıqlarını sonradan başqa şəxslərə sataraq pulunu ələ keçirib. Onun bu yolla zərərçəkmişlərə ümumilikdə 32 min manat ziyan vurduğu müəyyən edilib.

Faktla bağlı cinayət işi başlanılıb, C.Abdullayev barəsində məhkəmənin qərarı ilə həbs qətimkan tədbiri seçilib.

Həmin şəxsin qanunsuz əməllərindən zərərçəkən başqa vətəndaşlar varsa, bu barədə polis orqanlarına məlumat verə bilərlər.