İran vətəndaşı məhkəmə qarşısında

Sentyabrın 25-də Ağır Cinayətlərə Dair İşlər üzrə Məhkəmədə dələduzluqda təqsirləndirilən İran vətəndaşının eyni cinayət əməlinə görə sayca üçüncü məhkəmə prosesi başlayıb.

Lent.az-ın məlumatına görə, hakim Mayıl Bayramovun sədrliyi ilə keçirilən prosesdə təqsirləndirilən Roohihir Möhsen üçüncü dəfə məhkəmə qarşısına çıxarılıb. Hazırlıq iclası keçiriləndən sonra məhkəmə baxışı sentyabrın 28-ə təyin olunub.

Qeyd edək ki, R. Möhsen "Binə" Ticarət Mərkəzində bir neçə nəfəri aldadaraq onların etibarını qazanmaqla dələduzluq edib. İran vətəndaşı "Binə" Ticarət Mərkəzinin 10-dan çox işçisinin bir milyon manat pulunu mənimsəyib. Onlardan pul alaraq İranda istehsal olunan saxsı qablar gətirəcəyinə söz versə də, vədinə əməl etməyib.

Ağır Cinayətlərə Dair İşlər üzrə Məhkəmədə R. Möhsen törətdiyi əmələ görə, Azərbaycan Respublikası Cinayət Məcəlləsinin 178.3.2-ci (külli miqdarda ziyan vurmaqla dələduzluq etmə) maddəsi ilə təqsirləndirilərək 8 il müddətinə azadlıqdan məhrum edilib. Onun məhkəmə hökmündən verdiyi apellyasiya şikayətinə Bakı Apellyasiya Məhkəməsində hakim Etibar Nəbiyevin sədrliyi ilə baxılıb. Apellyasiya məhkəməsi birinci instansiya məhkəməsinin cinayət işinə baxarkən kobud qanun pozuntusuna yol verildiyini əsas gətirərək işə hazırlıq iclasından başlayaraq yenidən baxılması üçün Ağır Cinayətlərə Dair İşlər üzrə Məhkəməyə qaytarılması barədə qərar çıxarıb.

Ağır Cinayətlərə Dair İşlər üzrə Məhkəmədə hakim Ağababa Babayevin sədrliyi ilə R.Möhsenin cinayət işinə yenidən baxılaraq o, 7 il müddətinə azadlıqdan məhrum edilib.

Bakı Apellyasiya Məhkəməsi hakim Rəsul Səfərovun sədrliyi ilə R. Möhsenin apellyasiya şikayətinə növbəti dəfə baxıb. Məhkəmə Ağır Cinayətlərə Dair İşlər üzrə Məhkəmənin hökmünü ləğv edib və cinayət işini yenidən baxılması üçün birinci məhkəmə instansiyasına göndərilməsi barədə qərar çıxarıb.

Fərid Əkbərov