Salyanda üç yanacaqdoldurma məntəqəsinə silahlı basqın - YENİLƏNİB

Naməlum şəxslər məntəqələrdən xeyli pul aparıblar

Salyan rayonunda üç yanacaqdoldurma məntəqəsinə basqın olub. Hüquq-mühafizə orqanlarından APA-ya verilən məlumata görə, hadisə iyulun 6-da gecə saat 03:00 radələrində baş verib.

Cinayəti törədən 3 nəfər naməlum şəxs müxtəlif saatlarda rayonun Dayıkənd kəndindəki “Şükran”, Qızılağac qəsəbəsindəki “LUKoil” və Salyan şəhərindəki “Salyan” yanacaqdoldurma məntəqələrinə silahlı basqın edib. Naməlum şəxslər cinayəti həyata keçirmək üçün “VAZ 2106” markalı avtomobilindən istifadə ediblər. Onlar məntəqələrin işçilərinə zor tətbiq etməklə ümumilikdə 1000 manat aparıblar. “Şükran” yanacaqdoldurma məntəqəsindən 100, “LUKoil”dan 100, “Salyan” yanacaqdoldurma məntəqəsindən isə 800 manat basqınçılar tərəfindən quldurluq yolu ilə ələ keçirilib.

Daxili İşlər Nazirliyinin mətbuat xidmətindən fakt təsdiqlənib. Salyan rayon Polis Şöbəsindən isə bildirilib ki, hadisə nəticəsində xəsarət alan və saxlanılan olmayıb.

Faktla bağlı əməliyyat-axtarış tədbirləri davam etdirilir.