Müğənni Cavanşir Məmmədov məhkəmədə nazirliyi uda bilmədi

Əməkdar artist 4 min manatı geri ala bilmədi

Bu gün 1 saylı Bakı Yerli İqtisad Məhkəməsində məşhur müğənni, Azərbaycanın Əməkdar artisti Cavanşir Məmmədovun Vergilər Nazirliyi və Bakı şəhər Vergilər Departamentinin 1 saylı filialına qarşı qaldırdığı iddia üzrə sonuncu məhkəmə prosesi keçirilib. Məhkəmədən Lent.az-a verilən məlumata görə, hakim Tahirə Əsədova iddiaya baxılmamış saxlanılması barədə qərar qəbul edib. İddiaya baxılmamış saxlanması barədə qərar bir neçə proses keçirildikdən sonra verilib.

Lent.az məsələ ilə bağlı müğənninin özünə də müraciət edib. Lakin C.Məmmədov danışmaq istəmədiyini deyib.

Xatırladaq ki, C.Məmmədov məhkəmədən artıq hesablanmış əlavə dəyər vergisinin qaytarılmasını xahiş edib. Belə ki, toylarda ifaçılıq müqabilində aldığı qonorardan vergi verən müğənni ondan təxminən 4 min manata yaxın vəsaitin artıq alındığını iddia edirdi. O, həmin vəsaitin növbəti aylarda ödəniləcək vergiyə hesablanmasını istəyirdi.

Məsələ ilə bağlı bir neçə şadlıq sarayına sorğular da göndərilmişdi.

Pərvin ABBASOV