İsrailin Müdafiə Nazirliyindən ilk dəfə ETİRAF: “HƏMAS liderini biz məhv etmişik”

Müdafiə naziri İsrael Kats ilk dəfə olaraq Haniyənin məhvinin arxasında İsrailin olduğunu açıq şəkildə etiraf edib.

İsrail Müdafiə Nazirliyinin rəhbəri İsrael Kats ilk dəfə olaraq HƏMAS lideri İsmayıl Haniyənin məhv edildiyini açıq şəkildə etiraf edərək, İsrailin düşmənlərinin əsas fiqurlarına və strateji hədəflərinə hədəfli zərbələri davam etdirmək əzmində olduğunu bəyan edib.

Lent.az-ın xarici mediaya istinadla xəbərinə görə, Kats çıxışında İsrailin Yəməndə husilərə qarşı mübarizədə oxşar taktikalardan istifadə etməyə hazır olduğunu vurğulayıb.

“Biz husilərə ciddi ziyan vuracağıq, onların strateji infrastrukturunu məhv edəcəyik və onların rəhbərliyinin başını kəsəcəyik, necə ki, Tehran, Qəzza və Livanda Haniyə, Sinvar və Nəsrullaha etdiyimiz kimi”, - Kats deyib.

Müdafiə naziri vurğulayıb ki, İsrail husilərin yaratdığı təhlükəni dayandırmaq üçün qətiyyətlə hərəkət etmək niyyətindədir. Onun sözlərinə görə, zərbələr Yəmənin əsas bölgələrinə, o cümlədən Hodeydə və Sana yönələcək.

"İsrail nümayiş etdirdi ki, təhlükəsizliyimizin təhdid edildiyi bölgədə istənilən səviyyədə və istənilən yerdə fəaliyyət göstərə bilər", - Kats əlavə edib.

Müdafiə nazirinin bəyanatı İsrailin terror təşkilatlarının rəhbərlərinə qarşı məqsədyönlü zərbələr endirməklə təhdidləri aradan qaldırmaq strategiyasına sadiqliyini bir daha təsdiqləyir. Bu taktika düşmənin döyüş imkanlarını azaltmaqda və təsirini zəiflətməkdə effektiv olduğunu sübut edib.