BBC, “Alman dalğası”, “Amerikanın səsi” İrana qarşı

Ötən ilin yayında İranda keçirilmiş prezident seçkisindən sonra rəsmi Tehran dünyanın aparıcı teleradio şirkətlərinə hücuma keçdi. Hakimiyyət həmin qurumları “casusluqda” və “ölkədə pozuculuq fəaliyyəti göstərməkdə” suçladı.

Lent.az-ın “butovazerbaycanbirliyi”-nə istinadən məlumatına görə, dünyanın 5 aparıcı teleradio və ötürücüsünün rəhbərləri beynəlxalq verilişlərin yayımına Tehranın problem yaratmasına etiraz bəyanatı qəbul edib. Sənədi “Alman dalğası”, Fransanın beynəlxalq radiosu, Hollandiyanın eyni statuslu radiosu, BBC və “Amerikanın səsi” teleradio şirkətlərinin baş direktorları imzalayıb.

Bəyanatda bildirilib ki, Tehran hakimiyyəti son bir ildə davamlı olaraq, adları çəkilən informasiya vasitələrinin verilişlərinin yayımlanmasını əngəlləmək məqsədi ilə süzgəc və “parazit”lərdən yararlanır. Sənəddə Çinin də adı hallanıb. Bildirişdə şirkətin müxbir və əməkdaşlarının hər iki ölkənin uyğun qurumları tərəfindən hədələndikləri, onların peşə fəaliyyətinə maneələr törədildiyi vurğulanıb.

Sədrəddin Soltan