Uşağınız qeyri-adi davranır? - SƏBƏBİ

Uşaqlar həmişə öz çətinliklərini sözlərlə izah edə bilmirlər, amma onların davranışı bəzən ucadan siqnal verir. Diqqətli valideyn baxışı bu çağırışı görə bilər.

Lent.az bu barədə xarici mediaya istinadən xəbər verir.

Davranışdakı kəskin dəyişikliklər – ilk narahatedici zəngdir. Aktiv uşaq qapalı olur, ünsiyyətcil uşaq kontaktdan qaçır, şən uşaq daim kədərli görünür.

Yuxu və iştahdakı dəyişikliklər də çox şeyi deyir. Yuxusuzluq, qorxulu yuxular, iştahanın itməsi və ya əksinə, daim nəsə yemək istəyi daxili gərginlikdən xəbər verə bilər.

Aydın səbəbi olmayan ağrılar (baş, qarın) çox vaxt psixosomatik xarakter daşıyır. Uşağın bədəni emosional stressə reaksiya verir.

Uğurlarda kəskin eniş və ya məktəbə/bağçaya getmək istəməmək həmyaşıdlarla və ya müəllimlərlə konfliktin, zorakılığın (bulling) və ya öyrənmə çətinliklərinin göstəricisi ola bilər.

Sevimli məşğuliyyətlərə marağın itməsi ciddi narahatlıq siqnalıdır. Hobbidən uzaqlaşma və apatiya çox vaxt daxili problemlərin müşayiətidir.

Artan ağlağanlıq, əsəbilik və ya qeyri-adi aqressiya yaxınlara, heyvanlara, oyuncaqlara qarşı ifadə olunmamış ağrı və qorxunun əlamətidir.

Zərərli vərdişlərin yaranması (barmaq sorma, saç dolamaq və s.), eləcə də bacarıqlarda geriləmə (yenidən yatağa işəmə) uşağın daha təhlükəsiz zamana qayıtmaq istəyi ilə bağlıdır.

Həddindən artıq “ideal” davranış daim hamını razı salmaq cəhdi, səhv etmək qorxusu, həmçinin daxili narahatlıq və ya təzyiqdən xəbər verir.

Belə siqnallardan birini və ya bir neçəsini görən valideyn söhbəti təxirə salmamalıdır. Sakit vaxt və yer seçərək müşahidə ilə söhbətə başlamaq olar: “Mən fərq etdim ki, sən son vaxtlar...”. Burada əsas qayda danışmaqdan çox dinləməkdir.

Valideynin hökm vermədən və tələsmədən dinləməyə hazır olması ən böyük dəstəkdir. Siqnalları görməzlikdən gəlməyin, uşaq “hər şey qaydasındadır” desə belə. Çünki sizin diqqətiniz problemin erkən mərhələdə həllinə kömək edə bilər.