Smartfon yaddaşının böyük hissəsini şəxsi fayllar deyil, istifadə zamanı yığılan “rəqəmsal tullantılar” tutur. “Yaddaş doludur” bildirişi smartfon istifadəçiləri üçün ən əsəbi problemlərdən biridir. Bir çoxu dərhal foto, video və tətbiqləri silməyə başlayır, lakin əslində vacib məlumatları itirmədən də yaddaşı boşaltmaq mümkündür.
Lent.az xrici mediaya istinadən xəbər verir ki, smartfon yaddaşının əhəmiyyətli hissəsini şəxsi fayllar yox, istifadə prosesində toplanan müvəqqəti məlumatlar tutur.
Heç nə silmədən yaddaşı necə təmizləmək olar?
Mütəxəssislər bir neçə effektiv üsul tövsiyə edirlər:
Keşin (cache) təmizlənməsi. Tətbiqlər şəkillər, videolar və digər məlumatlar kimi müvəqqəti fayllar toplayır. Bunlar tətbiqin işləməsi üçün vacib deyil, amma çox yer tutur. Keşin silinməsi yaddaşı azad etməyin ən sürətli yollarından biridir.
Məsələn, Telegram aktiv istifadə zamanı cihazda 10–20 GB-a qədər məlumat toplaya bilər. Keşi təmizləmək üçün “Ayarlar” bölməsinə daxil olun, “Data və yaddaş” → “Yaddaş istifadəsi” bölməsinə keçin və “Keşi təmizlə” seçimini seçin.
Buluddan (cloud) yerli nüsxələrin silinməsi. Əgər foto və videolar artıq bulud xidmətlərində (məsələn, Google Foto və ya iCloud) saxlanılıbsa, onları cihazdan silmək olar və bu zaman məlumatlar itməz. Bu üsul yaddaşda xeyli yer boşaldır.
Dublikat faylların tapılması və silinməsi. Eyni foto və videolar bəzən nəzərə çarpmadan çox yer tutur. Xüsusi tətbiqlər bu faylları tez tapmağa kömək edir.
Əgər bu addımlardan sonra da yaddaş azdırsa, ən çox yer tutan tətbiqləri yoxlamaq faydalıdır. Çox vaxt nadir istifadə olunan bir neçə tətbiqi silmək və ya striminq xidmətlərində oflayn yükləmələri təmizləmək kifayət edir.
Smartfon yaddaşını boşaltmaq üçün mütləq vacib faylları silmək lazım deyil. Keşin təmizlənməsi, bulud nüsxələrinin idarə olunması və dublikatların silinməsi yaddaşı itkisiz şəkildə əhəmiyyətli dərəcədə artırmağa kömək edir. Bu addımları müntəzəm etmək və telefon tam dolana qədər gözləməmək tövsiyə olunur.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
