Xəzərdə nərə ovuna QADAĞA

Xəzərətrafı bütün ölkələr (Rusiya, Qazaxıstan, Azərbaycan, Türkmənistan və İran) nərə balıqlarının kommersiya əsası ilə ovuna daxili məhdudiyyət qoyublar. Beləliklə, regionda nəsli kəsilməkdə olan balıq növünün əldə olunmasına texniki moratorium qüvvəyə minib. Lent.az-ın məlumatına görə, bu barədə jurnalistlərə Ümumrusiya Elmi-Tədqiqat Balıq Təsərrüfatı və Okeanoqrafiya İnstitutunun direktoru Mixail Qlubokovski açıqlama verib.

Hazırda Rusiyanın Həştərxan şəhərində su bioresursları üzrə beynəlxalq komissiyanın iclası keçirilir. Komissiya Xəzər dənizinin durumunu və Xəzəryanı dövlət başçılarının 2014-cü il sammiti öncəsi bioresursların qorunması üzrə tədbirləri qiymətləndirir. Sammitin ən çox gözlənilən qərarlarından biri nərə balıqlarının ovuna 5 illik moratoriumun qoyulmasına dair müqavilə olacaq: “İndi bütün ölkələr könüllü, hüquqi əsas olmadan nərələrin sənaye üsulu ilə ovuna moratorium qoyublar. Bu balıqların yalnız elmi və çoxalma məqsədilə ovu mümkündür. Nərəkimilər SİTES konvensiyasına əsasən qorunurlar və bütün 5 ölkənin imzası olmadan nərələrin kürü və ixrac olunmur. Ona görə də bu məhsullar varlı bazarlara – Avropa İttifaqı, ABŞ və Çinə çıxarıla bilməz”.

Delikates alverini yalnız balıq emalı müəssisələri apara bilər. Bu zaman SİTES ərzağın mənşəyini yoxlayır. Moratorium rəsmən imzalanmayanadək ölkələr daxili bazar üçün nərə ovlaya bilərlər. Amma bu ərzaq çox bahadır. Alim deyib: “Məqsədimiz limanlarda ova nəzarətədək nərə ovuna de-yure moratorium müəyyənləşdirməkdir. Bu qərar SİTES-in Xəzər dənizi üçün daxili mexanizmindən uzaqlaşmaq və regiona nüfuz etmək istəyən kənar ölkələr üçün “nəfəsliy”i bağlamaq baxımından vacibdir”.

Qeyd edək ki, SİTES Konvensiyası 175 ölkənin imzaladığı beynəlxalq hökumətlərarası müqavilədir. Bu müqavilə məhvolma təhlükəsi ilə üzləşən vəhşi fauna və flora növlərinin beynəlxalq ticarətinə nəzarəti nəzərdə tutur. Konvensiya 3 mart 1973-cü ildə ABŞ-ın paytaxtı Vaşinqtonda bağlanılıb və 1975-ci il iyulun 1-dən qüvvəyə minib.