Ukraynadakı gənclər Dünya Azərbaycanlıları gününü qeyd edib

Ukrayna Azərbaycanlı Gənclər Birliyi (UAGİB) Vinnitsa şəhərindəki ”Fəridə Plaza” İstirahət və Əyləncə mərkəzində Dünya Azərbaycanlılarının həmrəylik gününə həsr olunmuş bayram konserti təşkil edib.

UAGİB–dən Lent.az-a verilən məlumata görə, Vinnitsa vilayət dövlət administrasiyası rəsmilərinin, meriya və yerli deputatlar şurası təmsilçilərinin, diaspora və KİV nümayəndələrinin qatıldığı bayram şənliyində Ukrayna Azərbaycanlı Gənclər Birliyinin Vinnitsa vilayət təşkilatının sədri Emin Adıgözəlov çıxış edərək, 22 il öncə təməli Heydər Əliyev tərəfindən qoyulmuş Dünya Azərbaycanlılarının həmrəylik gününün tarixi əhəmiyyətindən danışıb.

UAGİB sədri Anar Tahirov isə Azərbaycanla Ukrayna arasında dostluq münasibətlərinin möhkəmləndirilməsində, o cümlədən Azərbaycan həqiqətlərinin Ukrayna ictimaiyyətinə çatdırılmasında gənclərin üzərinə düşən öhdəliklərdən danışıb.

“2013-cü il dövlətimiz və xalqımız üçün ən yadda qalan illərdən biri oldu. Bu il Azərbaycan öz sosial-iqtisadi inkişaf tarixinə qlobal layihələrin həyata keçirilməsi ilə imza atdı”- deyən, Anar Tahirov bu il yekdilliklə prezident İlham Əliyevin yenidən dövlət başçısı seçilməsini 50 milyonluq Azərbaycan xalqının ən böyük uğurlarından biri kimi səciyyələndirib.

Qarşıdan gələn yeni il və dünya azərbaycanlılarının həmrəylik günü münasibəti ilə xalqımıza xoş və səmimi arzularını çatdıran Vinnitsa Dövlət Tibb Universitetinin prorektoru Sergey Zaiko, Vinnisa vilayət Şurası Aparatının rəhbəri Svetlana Pustovit 2 il öncə Vinnitsa vilayətində yaranmış Ukrayna Azərbaycanlı Gənclər Birliyinin regional təşkilatının, Azərbaycanın zəngin mədəniyyətini, qədim tarixini və adət-ənənələrini özündə əks etdirən çoxsaylı tədbirlər həyata keçirmələrindən məmnunluqla söz açıblar.

Bayram şənliyində çıxış edən “Fəridə Plaza” Ticarət və Əyləncə mərkəzinin sahib Eldar Nəzərov, ARDNŞ Ukrayna şirkətinin nümayəndəsi Həzi Aslanov və digər şəxslər təməli 1991-ci ildə qoyulmuş dünya Azərbaycanlılarının həmrəylik gününün müasir Azərbaycan tarixinin ən şanlı səhifəsinə çevrildiyini vurğulayıblar.

Təbdirdə UAGB-in Vinnitsa vilayət təşkilatının özfəaliyyət ansanblının ifasında geniş konsert və maraqlı ədəbi, bədii-kompozisya nümayiş etdirilib .