Təhsil Nazirliyi: “Uşaqların bağçalara cəlbi 14,8 faiz təşkil edir”

Hazırda respublikada 1677 məktəbəqədər təhsil müəssisəsi fəaliyyət göstərir. Məktəbəqədər təhsil müəssisələrindən 1637-si dövlət, 40 müəssisə isə özəldir. Bu barədə Lent.az-a Təhsil Nazirliyindən məlumat verilib. Nazirlikdən verilən məlumatda o da qeyd olunur ki, həmin məktəblərin 387-si Bakıda fəaliyyət göstərir: “Mövcud məktəbəqədər təhsil müəssisələrində 111090 uşaq tərbiyə alır və uşaqların məktəbəqədər təhsilə cəlbi 14,8 faiz təşkil edir”.

Nazirlikdən həmçinin “məktəbəqədər təhsil müəssisələrində qrupların yaradılması və fəaliyyəti ilə bağlı standartlar varmı” sualına da aydınlıq gətirilib: “Nazirlər Kabinetinin 2012-ci il 03 avqust tarixli 171 nömrəli Qərarı ilə təsdiq edilmiş “Təhsil müəssisələrinin tikintisinə, maddi-texniki təchizatına dair vahid normalar, ümumi sanitariya-gigiyena tələbləri, şagird yerləri ilə təminat normativləri” mövcuddur”.

Təhsil Nazirliyindən verilən açıqlamada o da qeyd olunur ki, məktəbəqədər təhsil müəssisələrində uşaqların yaş səviyyəsinə uyğun olaraq qruplar aşağıdakı kimi komplektləşdirilir:

1-2 yaş -15 uşaq

2-3 yaş -15 uşaq

3-4 yaş -20 uşaq

4-5 yaş -20 uşaq

5-6 yaş -20 uşaq