Təhsil Nazirliyi: “Ev tapşırıqlarının həcminin çoxluğu kurikulumla bağlı deyil”

Təhsil Nazirliyi kurikulum proqramının ağır olması barədə iradları əsassız sayır.

Lent.az-ın verdiyi məlumata görə, Təhsil Nazirliyi fənlər üzrə kurikulumlarda əsas yeri həmin fənnin məzmununu ifadə edən dövlət standartlarının tutduğunu bildirib.

Dövlət standartlarında hər bir sinif və təhsil səviyyələrinin (ibtidai, ümumi orta, tam orta) sonunda şagirdlərin nail olacaqları bacarıqlar və mənimsəyəcəkləri zəruri biliklər əks olunub. Məzmun standartları bilavasitə şagirdlərin təfəkkürlərinin inkişafına, onlarda idraki, kommunikativ (ünsiyyət), psixomotor bacarıqların formalaşdırılmasına yönəlib, dərsliklər də bu istiqamətdə hazırlanıb. Yeni kurikulumlar bilikləri hazır şəkildə şagirdlərə ötürməyi deyil, öyrənmə prosesində onların fəallığını, müstəqil fikir bildirmələrini və nəticələr çıxarmalarını, düşünmə yolu ilə problemlərə müstəqil cavab tapmalarını, yaradıcılığa, tədqiqatçılığa meyl etmələrini tələb edir. Belə olan halda, sinifdə işgüzar təlim şəraiti yaranır, uşaqların özünə inamı artır və onlar öyrənmə prosesinə daha fəal qoşulurlar: “Ev tapşırıqlarının həcminin çoxluğuna gəlincə isə, bildiririk ki, bu, kurikulumla bağlı deyil. Əslində, müasir tələb bundan ibarətdir ki, evə tapşırıq aşağı siniflərdə ya heç verilməsin, ya da çox az həcmdə verilsin. Çünki təlim materialları əsasən, sinifdə mənimsədilməlidir”.