Səbaildə uğur qazanmış idmançılarla görüş keçirilib

Səbail rayonunda dünya və Avropa çempionatlarında fərqlənən idmançılarla görüş keçirilib. Rayon İcra Hakimiyyətindən Lent.az-a verilən məlumata görə, 2013-cü ildə «Attila» idman klubunun idmançılarının müxtəlif yarışlarda uğurlu çıxışlarının yekunları ilə bağlı Səbail rayon İcra Hakimiyyətində təşkil olunan Səbail rayon İcra Hakimiyyətinin başçısı Asif Əsgərov açıb. Bildirilib ki, Səbail rayonunda fəaliyyət göstərən «Attila» İdman klubunun idmançıları həmişə olduğu kimi bu il ərzində də bir sıra beynəlxalq turnir və yarışlarda vətənimizi uğurla təmsil ediblər. İlin ən böyük nailiyyəti avqust ayına təsadüf edib. Braziliyanın Rio de Caneyro şəhərində keçirilən böyüklər arasında dünya çempionatında klubun yetirməsi Orxan Səfərov 60 kq çəki dərəcəsində III yerə çıxaraq vətənə bütünc medalla qayıdıb.

Bu il Polşada keçirilən Avropa kuboku yarışlarında Rəsullu Abdulhaqq 81 kq çəki dərəcəsində I və Rasim Alməmmədov III yerə, ABŞ-ın Mayami ştatında keçirilən Dünya kuboku yarışlarında Leyla Əliyeva 40 kq çəki dərəcəsində II yerə, Gənclər arasında Avropa çempionatında Oruc Vəlizadə də 60 kq çəki dərəcəsində III yerə çıxıb, Abu Dabi şəhərində keçirilən «Böyük dəbilqə» yarışlarında 60 kq çəki dərəcəsində Orxan Səfərov və 90 kq çəki dərəcəsində Ramin Qurbanov, Rusiya Federasiyasının Tümen şəhərində keçirilən «Masters» turnirində isə Elmar Qasımov 100 kq çəki dərəcəsində üçüncü yerə çıxaraq bütünc medala layiq görülüb. Klubun məşqçisi Vüqar Budaqov Abu Dabi şəhərində veteran idmançılar arasında keçirilən yarışlarda ikinci dəfə dünya çempionu adına layiq görülüb.

Bir neçə gün əvvəl «Attila» klubu idmançıları Cüdo üzrə klublararası Azərbaycan çempionatının qalibi olub. Ümumilikdə, klubun 75 idmançısı müxtəlif beynəlxalq yarışlarda iştirak edərək müxtəlif əyarlı 24 medal qazanmış, müxtəlif yaş qrupları üzrə Azərbaycan birinciliklərində 11 idmançı I, 6 idmançı – II və 5 idmançı III yerə çıxıblar. A.Əsgərov bu nailiyyət münasibəti ilə idmançımızı və bu uğurda böyük əməyi olan məşqçiləri təbrik etmiş, onlara yeni-yeni uğurlar arzulayıb. Tədbirdə iştirak edən idmançılara və onların məşqiçilərinə Səbail rayon İcra Hakimiyyəti tərəfindən mükafatlar təqdim olunub. İdmançılardan Orxan Səfərov, «Attila» İdman klubunun baş məşqiçisi Əli Dərvişov çıxış edərək idmançılara göstərilən diqqət və qayğıya görə ölkə rəhbərliyinə minnnətdarlıqlarını bildirib.