Dəri xərçənginin daha çox yayıldığı bölgələrin adları açıqlanıb

“Azərbaycanda dəri xərçənginə Kür-Araz ovalığı, Naxçıvan Muxtar Respublikası və Aran rayonlarında yaşayan əhali arasında daha çox rast gəlinir”. Lent.az-ın məlumatına görə, bunu Milli Onkologiya Mərkəzinin həkimi Elçin Mansurov bildirib. Onun sözlərinə görə, xəstəliyin yayılmasına səbəb insanların özlərini günəşin zərərli təsirindən qorumaması, özünüqoruma vasitələrindən istifadə etməməsidir: “Mütamadi olaraq günəş şüasının zərərli təsirinə məruz qalan insanlarda bədənin açıq nahiyələrində-üz, alın, baş dərisi, boyun, əllərdə dəri xərçəngi xəstəliyi yaranır”.

Həkim çimərliklərə gedən vətəndaşlara məsləhət də verib: “İnsanlara adətən dəniz kənarına gündüz saat 12.00-a qədər, günün ikinci yarısı isə 17.00-dan sonra getmək məsləhət görülür”.

E. Mansurov təəssüflə bildirib ki, bu saatlarda qaralmaq üçün qoruyucu vasitələrdən istifadə etmirlər, günəşin zərərli şüalarına məruz qalırlar: “Bu isə gələcəkdə müəyyən fəsatların yaranmasına səbəb ola bilər”.