“Ekonomist” jurnalının yeni il buraxılışı çapdan çıxıb - FOTO

Azərbaycanın «Ekonomist» MMC-nin təsis etdiyi «Ekonomist» aylıq analitik jurnalının növbəti, dekabr-yanvar buraxılışı çapdan çıxıb.

«APA-Economics»in məlumatına görə, jurnalın bu sayında Azərbaycan Dövlət Neft Şirkətinin özünə məxsus neft ixracının gələn ildən dayandırması barədə analitik məqalə, ölkənin tədiyyə balansının sahəvi təhlili, milli bank sisteminin əsas problemlərindən biri olan qeyri-faiz əməliyyatları üzrə zərərin yaranması barədə araşdırma yer alıb. Bundan əlavə, jurnalda bankların üç rüblük göstəriciləri üzrə renkinqlər və sığorta şirkətlərinin 11 aylıq göstəriciləri üzrə renkinqləri dərc edilib.

Qeyd edək ki, 2010-cu ilin fevral ayından nəşr olunan jurnalın artıq 46 buraxılışı işıq üzü görüb. «Ekonomist» jurnalında oxucular Azərbaycanın sosial-iqtisadi həyatının müxtəlif sahələri üzrə icmal və analitik xarakterli məqalə və araşdırma yazıları ilə tanış ola bilərlər.

«Ekonomist» jurnalını həm redaksiya vasitəsilə, həm də «Qaya» və «Azərmətbuatyayım» şirkətlərinin Bakı və Sumqayıt şəhərləri ərazisində fəaliyyət göstərən köşklərində abunə olmaq və almaq mümkündür.

Jurnal ayda bir dəfə, rus dilində, 3 min tirajla, A4 formatında nəşr olunur.