Boşanmaq istəyənlərlə bağlı YENİ QƏRAR

Mediasiya xərclərinin dövlət büdcəsi vəsaiti hesabına ödənilməsi qaydalarında vətəndaş məmnunluğunu təmin edən dəyişiklik edilib.

Ədliyyə Nazirliyindən Lent.az-a verilən məlumata görə, Mediasiya Şurası bildirir ki, Nazirlər Kabinetinin 2019-cu il 16 avqust tarixli 360 nömrəli qərarı ilə təsdiq edilmiş “Mediasiya xərclərinin dövlət büdcəsi vəsaiti hesabına ödənilməsi qaydası”nda dəyişiklik edilməsi barədə Nazirlər Kabinetinin 2022-ci il 19 avqust tarixli 316 nömrəli qərarına əsasən “Mediasiya xərclərinin dövlət büdcəsi vəsaiti hesabına ödənilməsi qaydası”nın (“qayda”) 1.3-cü bəndi (“Bu qayda tərəflərdən hər hansı biri ilkin mediasiya sessiyasında üzrsüz səbəbdən iştirak etmədiyi halda tətbiq edilmir.”) vətəndaş məmnunluğunun təmin edilməsi məqsədi ilə ləğv edilib.

Məlum olduğu kimi qayda “Mediasiya haqqında” qanunun 28-ci maddəsinə uyğun olaraq ilkin mediasiya sessiyası zamanı mediasiya xərclərini ödəmək üçün kifayət qədər vəsaiti olmayan fiziki şəxslərin mediasiya xərclərinin (mediasiya xidmətinin göstərilməsinə görə ödənilən haqqın və digər xərclərin) dövlət büdcəsi vəsaiti hesabına ödənilməsi qaydasını müəyyən edir.

Hazırkı dəyişikliyə əsasən qayda tərəflərdən hər hansı biri ilkin mediasiya sessiyasında üzürlü və ya üzürsüz səbəbdən iştirak etmədiyi halda da tətbiq ediləcəkdir.

Bildirilir ki, qaydaya əsasən mediasiya xərclərini ödəmək üçün kifayət qədər vəsaiti olmayan fiziki şəxslərə aşağıdakılar aiddir:

1. ünvanlı dövlət sosial yardımı alan ailələrin üzvləri;

2. Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin müvafiq yerli qurumlarında və “DOST” mərkəzlərində işsiz kimi qeydiyyatda olan şəxslər.

Qeyd edilən kateqoriyalardan olan fiziki şəxslər mediasiya xərclərinin dövlət büdcəsi hesabına ödənilməsi üçün aşağıdakı sənədləri mediatora təqdim etməlidir:

- mediasiya xərcinin dövlət büdcəsi hesabına ödənilməsi barədə ərizə;

- şəxsiyyət vəsiqəsinin surəti;

- fiziki şəxsin qeyd edilən kateqoriyalardan birinə aid olduğunu təsdiqləyən sənədin surəti.

Fiziki şəxsin qeyd edilən kateqoriyalardan birinə aid olduğunu təsdiqləyən sənəd onların müraciəti əsasında Əmək və Əhalinin Sosial Müdafiəsi Nazirliyi tərəfindən verilir.

Həmçinin fiziki şəxs həmin sənədi Əmək və Əhalinin Sosial Müdafiəsi Nazirliyinin “e-sosial” internet portalında yaradılan elektron kabineti vasitəsilə və ya “DOST” mərkəzlərinə müraciət etməklə əldə edə bilər.

Mediatorlar siyahıda qeyd edilən sənədləri digər zəruri sənədlərlə, o cümlədən mediasiya xərclərinə dair hesabatla birlikdə mediasiya təşkilatı vasitəsilə Mediasiya Şurasının İdarə Heyətinə ünvanlamalıdır. Mediasiya Şurasının İdarə Heyəti daxil olmuş sənədlərə baxdıqdan sonra imtina üçün əsaslar olmadıqda mediasiya xərcinin dövlət büdcəsi hesabına ödənilməsi barədə qərar qəbul edir və müvafiq vəsait mediasiya təşkilatına ödənilir.