İyulda hərbi xidmətə çağırışa Əliağa Hüseynov rəhbərlik edəcək

Azərbaycan Nazirlər Kabineti «2009-cu ilin iyulun 1-dən 30-dək Azərbaycan Respublikası vətəndaşlarının həqiqi hərbi xidmətə çağırışı üzrə Respublika Çağırış Komissiyasının tərkibi»ni təsdiq edib.

Bu barədə APA-ya Nazirlər Kabinetindən məlumat verilib.

Baş nazir Artur Rasizadənin imzaladığı qərarla Respublikan Çağırış Komissiyası və Naxçıvan Muxtar Respublikasının Çağırış Komissiyası vətəndaşların Silahlı Qüvvələrə və qanunvericilikdə nəzərdə tutulmuş digər silahlı birləşmələrə həqiqi hərbi xidmətə çağırışını təmin edəcək.

Nazirlər Kabineti, həmçinin, Müdafiə, Səhiyyə, Daxili İşlər, Nəqliyyat, Maliyyə nazirliklərinə və yerli icra hakimiyyəti orqanlarına vətəndaşların həqiqi hərbi xidmətə çağırılmasını təmin etmək məqsədi ilə aidiyyəti tədbirlər görməsini tapşırıb.

Qərara əsasən, respublika hərbi komissarı, general-leytenant Əliağa Hüseynov Respublika Çağırış Komissiyasının sədri, Dövlət Sərhəd Xidmətinin rəis müavini Məhəmməd Abbasquliyev isə müavin təyin olunub.

Qeyd edək ki, bundan əvvəlki aprel çağırış mövsümündə Respublika Çağırış Komissiyasına polkovnik Ramiz Məmmədov rəhbərlik etmişdi.