Yeni yaradılacaq ali məktəblərin binaları Xocahəsən qəsəbəsində tikiləcək

Sentyabrın 26-da M.V.Lomonosov adına Moskva Dövlət Universitetinin Bakı filialının Binəqədi rayonu Xocahəsən qəsəbəsindəki yeni tədris kompleksinin açılış mərasimi keçirilib.

Lent.az-ın AzərTAC-a istinadən verdiyi məlumata görə, açılış mərasimində çıxış edən Azərbaycan Respublikasının prezidenti İlham Əliyev bu zonanın şəhərin mərkəzindən çox uzaq olmadığını söyləyib.

Dövlət başçısı bildirib ki, Azərbaycan paytaxtının sürətlə inkişafını və infrastrukturu təkmilləşdirmək planları nəzərə alınsa, bir neçə ildən sonra bu yer daha çox məskunlaşacaq: “Bizim burada, bu zonada tələbə şəhərciyi yaradılması ilə bağlı müəyyən planlarımız var. Başqa sözlə, gələcəkdə, yeni ali təhsil müəssisələri yaradılarsa, yəqin ki, onlar burada yaradılacaq. Eyni zamanda, bəzi ali məktəblərimizin bu zonaya köçürülməsi ilə bağlı ideyalar da var ki, şəhərimizin infrastrukturunun tərəqqisində məhz tədris-tələbə istiqamətini burada inkişaf etdirək”.