Obama: “Ermənistan məsələsində Türkiyənin mövqeyi önəmlidir”

“ABŞ-ın bu məsələni başqa yerə yönəltməsini istəmirəm”

ABŞ prezidenti Barak Hüseyn Obama Ankarada görüşlərə başlayıb. Lent.az-ın məlumatına görə, ABŞ prezidenti Anıtqəbri ziyarət edəndən sonra türkiyəli həmkarı Abdulla Güllə görüşüb. Görüşdən sonra prezidentlər birgə mətbuat konfransı keçiriblər. Jurnalistlərin qondarma “erməni soyqırımı” ilə bağlı sualını cavablandıran Obama “mənim bu barədə fikirlərim məlumdur, qərarım dəyişməyib”, - deyib.

“Amma məni ən çox həyəcanlandıran odur ki, Abdulla Gülün liderliyi ilə Ermənistanla müzakirələr aparılır. Mən də bu müzakirələri izləyirəm, bunlar qısa müddətdə bəhrəsini verəcək” – Obama əlavə edib.

ABŞ prezidenti bundan sonra öz fikirlərinə yox, Türkiyənin mövqeyinə əhəmiyyət vermək istədiyini deyib: “Bütün diqqətimi Türkiyənin mövqeyinə yönəltmək istəyirəm. Bu məsələdə irəliyə gedən yolun qısa müddətli olmasına çalışıram. ABŞ-ın nə edəcəyi barədə heç nə demək istəmirəm. İstəyirəm ki, prezident Gülə indiyədək uğurla davam edən müzakirələrdə yardım edim. ABŞ-ın bu məsələni başqa yerə yönəltməsini istəmirəm”.

Obama terrorla mübarizəyə dair sualları “PKK bizim də terrorçu siyahımızdadır, biz Türkiyə ilə dost olmaqdan heç vaxt vaz keçməmişik, istəyirəm bu əlaqələri daha da inkişaf etdirək. Türkiyəyə terrorla mübarizədə lazım olan dəstəyi verəcəyik, terrorçuluq heç bir şəkildə qəbul edilməz”, - şəklində cavablandırıb.