Müasir texnologiyalar insanların həyat tərzini köklü şəkildə dəyişib. Smartfon, planşet və digər elektron cihazların ekranları günün istənilən saatında, hətta gecə vaxtı belə diqqətimizi özünə cəlb edir. Bununla belə, alimlər xəbərdarlıq edirlər ki, yatmazdan əvvəl qadcetlərdən istifadə sağlamlıq üçün ciddi risklər yarada bilər.
Lent.az xarici mediaya istinadla xəbər verir ki, bu vərdişin insan orqanizminə mənfi təsir göstərməsinin bir neçə əsas səbəbi var.
Mavi işığın təsiri
Elektron cihazların ekranlarından yayılan mavi işıq yuxu rejimini poza bilər. Araşdırmalar göstərir ki, bu işıq orqanizmin təbii sirkadiyal ritminə təsir edərək yuxuya getməyi çətinləşdirir və yuxusuzluğa səbəb olur. Nəticədə insanın daxili bioloji saatı pozulur və gündəlik həyat ritmi dəyişə bilir.
Stress və depressiya riski
İnternetdəki məlumat axınının davamlı şəkildə izlənilməsi stress və narahatlıq səviyyəsini artırır. Yatmazdan əvvəl parlaq ekranlara baxmaq orqanizmin rahatlamasına mane olur və keyfiyyətli yuxunu çətinləşdirir. Bu isə insanın özünü gərgin, yorğun və ruhdan düşmüş hiss etməsinə səbəb ola bilər. Mütəxəssislər bildirirlər ki, bu hal depressiv əlamətlərin güclənməsinə də şərait yarada bilər. Bundan əlavə, internetdə yayılan məzmunun böyük hissəsinin mənfi xarakter daşıması psixoloji sağlamlığa əlavə təzyiq göstərir.
Münasibətlərdə problemlər
Yataqda telefondan istifadə partnyorun diqqətdən kənarda qalmasına səbəb ola bilər. Bu isə qarşı tərəfdə inciklik və narazılıq hissi yaradır. Uzun müddət davam edən bu vəziyyət münasibətlərdə gərginliyi artıraraq mübahisələrə və anlaşılmazlıqlara yol aça bilər.
Bunun əvəzinə nə etmək olar?
Mütəxəssislər yatmazdan əvvəl daha faydalı vərdişlərə üstünlük verməyi tövsiyə edirlər. Məsələn, kitab oxumaq, sakitləşdirici musiqi dinləmək və ya gündəlik yazmaq beynin rahatlamasına kömək edə bilər. Gün ərzində yaranmış mənfi düşüncələri kağıza köçürmək daxili gərginliyi azaltmağa və daha sakit, keyfiyyətli yuxu əldə etməyə imkan verir.
Mütəxəssislərin fikrincə, sağlam yuxu rejiminin qorunması üçün yatmazdan ən azı bir saat əvvəl elektron cihazlardan istifadəni məhdudlaşdırmaq faydalı ola bilər. Bu sadə vərdiş həm fiziki, həm də psixoloji sağlamlığın qorunmasına müsbət təsir göstərə bilər.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
