İsrafil İsrafilov mətbuat konfransına niyə gəlmədi?

Akademik Milli Dram Teatrında 143-cü mövsümün açılışı ilə bağlı mətbuat konfransı keçirilir. Lent.az-ın məlumatına görə, konfransda jurnalistlər qarşısına teatra yenicə baş rejissor və bədii rəhbər təyin olunmuş Azər Paşa Nemətov keçib.

Son vaxtlar teatrda baş verənlərlə bağlı bir çox sualları cavabsız qoyan teatrın direktoru İsrafil İsrafilov isə gözlənildiyi kimi, jurnalistlərlə görüşə qatılmayıb. Bunun səbəbini baş rejissor belə izah edib: “Birincisi, bu, mənim mətbuat konfransımdır. Teatrın bədii rəhbəri teatr haqqında danışmalıdır, başqa adamlar yox. Hərə öz yaradıcılığı haqqında danışa bilər. Direktorun buraya dəxli yoxdur. Mən sizi, siz məni yaxşı tanıyırsınız. Uzun illərdir Teatr Xadimləri İttifaqının sədriyəm. Orda xeyli işlər görülüb. Teatrda yaranan gərginliyi aradan qaldırmaq üçün ilk növbədə bu addımı atdım. 70 nəfərlik truppa ilə görüşdüm. Bir-bir hər aktyoru dinlədim”.

Repertuardan tamaşaların çıxarılmasına gəlincə isə, baş rejissor bunu deyib: “Bəlkə kiminsə qaşı-gözü xoşuna gəlmir. Mən keçmişə qayıtmağı sevmirəm. O vaxt burada olmamışam, ona görə də deyə bilmərəm nə üçün bir çox tamaşalar repertuardan çıxarılıb”.