Rəssamlıq Akademiyasının yeni rektorunu yaxından tanıyaq

Bu gün Prezident İlham Əliyevin sərəncamı ilə Natiq Kamal oğlu Əliyev Azərbaycan Rəssamlıq Akademiyasının rektoru təyin edilib.

Bəs Natiq Əliyev kimdir?

Lent.az onun barəsində məlumatı diqqətinizə çatdırır.
Öncə onu qeyd edək ki, Xalq rəssamı Natiq Əliyev rektor təyin edilənə qədər Azərbaycan Rəssamlıq Akademiyasının professoru olaraq heykəltəraşlıq kafedrasında emalatxana rəhbəri və akademiyanın bədii-metodiki şurasının sədri vəzifəsində çalışıb.

O, 10 avqust 1958-ci ildə Bakı şəhərində anadan olub. 1974-1978-ci illərdə Ə.Əzimzadə adına Azərbaycan Dövlət Rəssamlıq Məktəbini "Fərqlənmə diplomu" ilə bitirib.

Rəssamın çoxlu saylı mükafatları arasında Mədəniyyət və Turizm Nazirliyinin təsis etdiyi "Zirvə" mükafatı, Avstriyanın I dərəcəli "Cəngavər Ordeni" də var. 2018-ci ildə Azərbaycan Prezidenti tərəfindən “Şöhrət ordeni”nə layiq görülüb.

Heykəltəraş, Xalq rəssamı Natiq Əliyev yüzlərlə heykəlin müəllifidir. Onun əl işləri olan abidələr Meksika, Serbiya, Rusiya, Ukrayna, Gürcüstan, Türkiyə Monteneqroda müxtəlif şəhərlərin küçə və meydanlarını bəzəyir. Azərbaycan mədəniyyətinin 30-dan çox görkəmli simasının, siyasətçilərin heykəl və büstləri də Xalq rəssamının əlinin məhsuludur.

Onun Heydər Əliyevin xatirəsinə yaratdığı abidə Tbilisinin əsas meydanlarından birində ucaldılıb.