“Hər şey gözəldir həyatda” mahnısını dinləməyən az adam tapılar. Səsləndiyi gündən ürəkləri isidən bu mahnının maraqlı yaranma tarixçəsi var. Bu mahnı əslində yazılmayıb.
“Mahnının yaranmasının maraqlı tarixi var. Şəki teatrında göstəriləcək bir tamaşa üçün musiqi yazırdım. Maliyyə imkanları az olduğuğundan mahnını yazdım, özüm studiyada oxudum göndərdim. O vaxt Zülfiyyə Xanbabayeva, Brilliant Dadaşova gənc idilər, tanınmırdılar, mahnını onlara da oxutmuşdum”,- deyə Cavanşir Quliyev Lent.az-a verdiyi müsahibədə bildirib.
“Ramiz Həsənoğlu bu mahnıları Şəki teatrında qonaq olarkən dinləyibmiş. Həmin ərəfədə AzTV haqqımda proqram hazırlayırdı, veriliş 50 dəqiqə olmalıydı. Mahnılarımı verdilər, amma son 5 dəqiqə boş qalırdı. Verilişin rejissoru, dostum Ramiz Həsənoğlu düşdü üstümə ki, yenə mahnı ver. Mahnı qalmayıb. Dedi Şəki teatrında dinlədiyim mahnıların əlaydı. Şəki teatrına verdiyim, tamaşa üçün yazılmış iki yarımçıq mahnını birləşdirib bir mahnı elədim. Biri vals idi, biri bir kuplet mahnı. Fikir versəniz, mahnı iki ayrı hissədən ibarətdir. Giriş və son dəyişir. Birləşdirdim, piano, gitara saksafon, Brilliant və mən oxuduq. Əslində imkan yox idi deyə, ansambl yığa bilmədim. Dedim tənqid edəcəklər, əksinə bəyənildi. Hələ də anlamıram niyə? Əvvəl elə bilirdim tərifləyəndə lağ edirlər. Yəqin fərqli səs tonallığı insanların xoşuna gəlmişdi”,- deyə bəstəkar qeyd edib.
