Rusiya telekanalında Azərbaycan mədəniyyətindən danışılacaq

Rusiya Federasiyasının “Kultura” telekanalının Alla Siqalovanın müəllif və aparıcısı olduğu “Göz gözə” telelayihəsinin növbəti buraxılışı Azərbaycan mədəniyyətinə həsr edilib.

Buraxılışı hazırlamaq məqsədilə beş nəfərdən ibarət çəkiliş qrupu Bakıda səfərdə olub. Mədəniyyət və Turizm Nazirliyinin Beynəlxalq əlaqələr və mədəniyyət proqramları şöbəsindən Lent.az-a verilən məlumata görə, çəkilişin birinci günündə “Eurovision 2011”-in qalibləri Nigar Camal və Eldar Qasımovun iştirakı ilə “Ulduz ilə mətbəx” epizodu lentə alınıb. Epizod zamanı Alla Siqalova ilə birlikdə ulduzlar milli yemək hazırlayıb, həm mətbəx bacarıqları, həm də öz ifaları ilə məharətlərini göstəriblər.

Çəkilişlərin ikinci günü “Azərbaycan rəqsi” epizodu lentə alınıb. Azərbaycan Dövlət Filarmoniyasında Dövlət Rəqs Ansamblının ifasında ölkəmizin milli rəqsləri olan “Yallı”, “Toy”, “İgidlər” çəkiliş qrupu tərəfindən çəkilib. Rəqslərdən sonra ansamblın rəqqasları milli rəqsimizin bəzi elementlərini verilişin aparıcısı Alla Siqalovaya öyrədiblər. Sonra Filarmoniyanın binasında ansamblın bədii rəhbəri Afaq Məlikovadan müsahibə götürülüb.

Proqramın “Milli geyim” epizodunun hazırlanması üçün çəkilişin üçüncü günü Dövlət Rəqs Ansamblının rəqqasları açıq havada “Qala” Arxeoloji-Etnoqrafik Muzey Kompleksində Azərbaycanın milli geyimlərini nümayiş etdiriblər.

Daha sonra çəkilişlər “Göz gözə” verilişinin aparıcısı və müəllifi Alla Siqalovanın təqdimatında paytaxtımızın gəzməli və görməli məkanlarında davam etdirilib. Verilişin hazırlıq işləri başa çatdıqdan sonra yaxın zamanlarda “Kultura” telekanalının efirində göstəriləcək.

Xəyalə