Argentinada Azərbaycan turizminin təbliğinə dair tədbir keçirilib - FOTO

Xarici İşlər Nazirliyinin mətbuat xidmətindən Lent.az-a verilən məlumata görə, tədbirdə Argentinanın Avropa və Asiya ölkələri üzrə 60-a yaxın turist operator şirkətləri, aparıcı turizm assosiasiyalara və turizm sektorunun təşviqi ilə məşğul olan KİV-lərin nümayəndələri iştirak ediblər.

Tədbirdə çıxış edən Azərbaycan Respublikası Dövlət Gömrük Komitəsinin sədri Aydın Əliyev ölkəmizin turizm potensialı, bu potensialın inkişaf etdirilməsi istiqamətində atılmış addımlar barədə danışıb. O, ölkəmizin gözəlliklərinin şahidi olmaq üçün Argentina turistlərini Azərbaycana dəvət edib və bu məsələdə turist operatorlarının rolunun önəmli olduğunu söyləyib.

Çıxışlardan sonra Mədəniyyət və Turizm Nazirliyi tərəfindən çəkilmiş “Azərbaycan unudulmaz ölkə” filmi nümayiş etdirilib.
Tədbir vaxtı iştirakçılara Azərbaycan turizminin təşviqini əks etdirən kitab və materiallar paylanılıb, ölkəmizin müxtəlif mənzərələri və mədəni-tarixi abidələrinin fotosərgisi, habelə milli xalçalarımızın nümayişi təşkil olunub.
Tədbir Azərbaycan mətbəxinin təqdimatından ibarət ziyafət və milli musiqiçilərimizdən ibarət konserti ilə davam etdirilib.