Əlixan Səmədov Azərbaycanda ilk dəfə solo konsert verəcək

İfası ilə dünyaya səs salan Əlixan Səmədov noyabrın 22-də Heydər Əliyev Sarayında həmvətənlilərinin görüşünə gələcək

Mədəniyyət və Turizm Nazirliyi və Dünya Azərbaycanlıları İctimai Birliyinin birgə təşkilatçılığı ilə ilk dəfə olaraq Bakıda Azərbaycanın dünya şöhrətli balaban ifaçısı Əlixan Səmədovun solo konserti keçiriləcək. Sevimli ifaçımız Əlixan Səmədov azərbaycanlı musiqisevərlərin görüşünə noyabrın 22-də Heydər Əliyev Sarayının səhnəsində gələcək.

Artıq günü və məkanı dəqiqləşən konsert proqramında Əlixan Səmədov 3 saata yaxın səhnədə möhtəşəm ifası ilə tamaşaçıları sevindirəcək. Xüsusi ilə onu vurğulayaq ki, Əlixan Səmədovun Bakıdakı konserti “Bakı – İslam Mədəniyyətinin Paytaxtı” ili çərçivəsində təşkil olunacaq. Ə.Səmədov Bakıdakı ilk konsertində maraqlı proqramla çıxış edəcək, ancaq o, səhnədə tək olmayacaq. Belə ki, Əlixan bəylə birgə səhnədə daha bir neçə ifaçı olacaq. Hazırda ciddi-cəhdlə proqramı hazırlanan konsertin son variantı gələn həftə dəqiq məlum olacaq. Əlixan Səmədovun konsertinin biletlərinin qiyməti də müəyyənləşdirilir. Dünyanın 45 ölkəsində konsertləri ilə insanları məftun edən Ə.Səmədov, ilk dəfə olaraq vətəni Azərbaycanda konsert verəcək.

Qeyd edək ki, Əlixan Səmədovun Bakıdakı konsertinin informasiya dəstəyi Lent.az, Vesti.az portallarına və APA İnformasiya Agnetliyinə məxsusdur.

Xatırladaq ki, Əlixan Səmədov 1993-cü ildən etibarən Türkiyədə yaşayır və qısa müddətdə balabanda peşəkar ifası ilə dünyaya səs salıb. Musiqiçinin ilk albomu da “Balaban” adı altında hazırlanmışdı. Bu günə kimi bir çox mükafatlara layiq görülən Ə.Səmədov Azərbaycanın milli musiqi aləti olan balabanı musiqi və sənət aləmində dünyaya çatdırıb. Azərbaycanlı Əlixan Səmədov 1993-cü ildə “Xalq Rəqsləri yarışması”nın “Ən yaxşı musiqiçi”, 1996-cı ildə “Ən yaxşı musiqi və ən yaxşı musiqiçi”, 1997-ci ildə “Milliyyət qəzetinin” yarışması xüsusi mükafatı, 2005-ci ildə “Musiqi çalışmalarından dolayı”, 2007-ci ildə akademik Yusif Məmmədəliyev adına medalla təltif olunub. Bundan əlavə, Ə.Səmədov bu illər ərzində Türkiyə ilə yanaşı, Almaniya, Fransa, Yaponiya, İspaniya, Sinqapur, Makedoniya, Kosovo, Rumıniya, Yunanıstan, Bolqarıstan, kimi ölkələrdə konsert proqramları ilə çıxış edib.