Seyran Cəfərliyə 90-cı mükafat BMT-dən gəldi

Tanınmış karikatura ustası, müxtəlif beynəlxalq müsabiqələrin laureatı Seyran Cəfərli növbəti imzaya uğur atıb. Karikaturaçının sayca 90-cı mükafatı Birləşmiş Millətlər
Təşkilatından gəlib. Onun “Həqiqət carçısı” əsəri BMT-nin Ranan Lurie adına beynəlxalq karikatura müsabiqəsində “Mükəmməliyyət” ödülünə layiq görülüb.

Bu barədə Lent.az-a məlumat verən karikaturaçının sözlərinə görə, BMT siyasi karikatura ustası Ranan Lurie adına təsis etdiyi bu beynəlxalq karikatura müsabiqəsini hər ilin sonunda keçirir. Yarışmada müxtəlif yazıçı və rəssamların, BMT-nin prinsiplərini təsvir, siyasi cizgi mükəmməlliyi və ən yüksək standartı təbliğ edən əsərləri dəyərləndirilir. Seyran Cəfərlinin əsəri də məhz münsiflər heyətinin qərarı ilə adı çəkilən mükafatı qazanıb: “Münsiflər heyətinin sədri Nobel mükafatı laureatı Elie Viesel idi. Üzvləri arasında isə BMT-nin Müxbir Assosiasiyasının prezidenti Giampaolo Pioli, Yazıçılar və Rəssamlar Cəmiyyətinin prezidenti Hans Janitschek vardı. Hesab edirəm ki, jüri əsərləri dəyərləndirərkən obyektivlik nümayiş etdirdilər. Birinci və üçüncü yerə Braziliya, ikinci yerə İsveçrə təmsilçiləri çıxdı”.

Karikatura ustası əsərinə verilən bu böyük dəyərdən hədsiz qürur duyduğunu və bundan sonra da daha yeni uğurlara imza atacağına əmin olduğunu bildirib.

Xəyalə Muradlı