Şərif Ağayarın “Aftafalı Antrakt”ı

Yazar Şərif Ağayarın yeni nəsr kitabı işıq üzü görüb. Kitab “Aftafalı Antrakt” adlanır. Kitab barədə Lent.az-a məlumat verən müəllif bildirib ki, kitab “E.L.” nəşriyyatında çap olunub. Burada onun povest və hekayələri yer alıb. Kitab “Laçınsız ilk gün”, “Antrakt” və “Kosmos əsrinin gerçəkləri” bölmələrindən ibarətdir. Kitabda oxucular tərəfindən qəzet və jurnallarda, eləcə də internet saytlarında maraqla qarşılanan hekayələrlə yanaşı, yeni nümunələr də var. Rəngarəng mövzuları əhatə edən hekayələrin çoxu son illər yaşanan hadisələrdən, Qarabağ faciəsinə düçar olmuş insanların çətin həyatından bəhs edir. Kitab müəllif sözü ilə açılır və redaktor Əsəd Cahangirin yazara ünvanladığı təəssürat məktubu ilə davam edir.

Qeyd edək ki, “Aftafalı Antrakt” Şərif Ağayarın sayca üçüncü kitabıdır. Bundan öncə yazarın “Səhra məsnəvisi” (şeirlər) və “Kərpickəsən kişinin dastanı” (povest) kitabları işıq üzü görüb.

“Aftafalı Antrakt” kitabını “Əli və Nino” və “Akademikkitab” mağazalarından əldə etmək olar.

Xəyalə