“Jerar Depardyeni Bakıya gətirmək çətin olmadı”

Lent.az-ın məlumatına görə, bunu Mstislav Rostropoviç Fondunun prezidenti Olqa Rostropoviç bu gün keçirdiyi mətbuat konfransında deyib. O bildirib ki, Jerar Depardye Bakıda bir neçə gün qalacaq və regionları da gəzəcək.

Aktyor dekabrın 13-də Azərbaycan Dövlət Akademik Opera və Balet Teatrında nümayiş olunacaq “Karmen” tamaşasından əvvəl səhnəyə çıxaraq, Prosper Morimenin “Karmen” novellasından seçilən hissələri səsləndirəcək. Həmin gün J.Bizenin “Karmen” tamaşası Qalina Vişnyevskayanın Opera Mərkəzinin solistlərinin ifasında Rastropoviç adına IV Beynəlxalq Festival çərçivəsində təqdim olunacaq. Əsas partiyaları məşhur müğənnilər, vokalistlərin beynəlxalq müsabiqələrinin laureatları Alina Şakirova (Karmen partiyası), Oleq Dolqov (Xoze partiyası), Anastasiya Privoznova (Mikaella partiyası), həmçinin həmyerlimiz, Rusiyanın Dövlət Akademik Böyük Teatrının solisti Elçin Əzizov (Eskamilio partiyası) ifa edəcək. Operanın dirijoru məşhur Rusiya dirijoru Yaroslav Tkalenko olacaq. Tamaşanın quruluşçu-rejissoru İvan Popovskiydir.

Xəyalə Muradlı